រដ្ឋមន្រ្តីការពារជាតិអូស្រ្តាលីលោក Richard Marles និយាយនៅថ្ងៃព្រហស្បតិ៍នេះថា លោកមានជំនឿចិត្តថា កិច្ចព្រមព្រៀងនាវាមុជទឹក AUKUS ជាមួយសហរដ្ឋអាមេរិក និងអង់គ្លេស នឹងបន្ត ហើយរដ្ឋាភិបាលរបស់លោកនឹងធ្វើការយ៉ាងជិតស្និតជាមួយអាមេរិក ស្របពេលដែលរដ្ឋបាលលោកប្រធានាធិបតី Donald Trumpកំពុងពិនិត្យមើលវាជាផ្លូវការ ។

កាលពីឆ្នាំ ២០២៣ អូស្រ្តាលីបានប្តេជ្ញាចិត្តចំណាយថវិការ ២៣៩ពាន់លានដុល្លារក្នុងរយៈពេលជាង ៣ទសវត្សរ៍លើកិច្ចព្រមព្រៀង AUKUS ដែលជាគម្រោងការពារជាតិធំបំផុតរបស់ពួកគេជាមួយសហរដ្ឋអាមេរិក និងអង់គ្លេស ដើម្បីតម្រូវឲ្យផលិតនាវាមុជទឹកដើរដោយថាមពលនុយក្លេអ៊ែរ ។

អំឡុងបទសម្ភាសន៍នៅថ្ងៃព្រហស្បតិ៍នេះជាមួយទូរទស្សន៍ Sky News Australia លោក Marles និយាយថា ពួកយើងនឹងធ្វើការយ៉ាងជិតស្និតបំផុតជាមួយសហរដ្ឋអាមេរិកលើគម្រោងមួយនេះ ប៉ុន្តែពួកយើងពិតជាជឿជាក់ពីវឌ្ឍនភាពនៃកិច្ចព្រមព្រៀង AUKUS ហើយនិងជឿជាក់ពីវិធីដែលវានឹងបន្តក្រោមរដ្ឋបាលរបស់លោក Trump ។

គេរំពឹងថា នាយករដ្ឋមន្រ្តីអូស្រ្តាលីលោក Anthony Albanese នឹងជួបជាមួយប្រធានាធិបតីសហរដ្ឋអាមេរិកលោក Donald Trumpជាលើកដំបូងនៅសប្តាហ៍ក្រោយ នៅក្រៅកិច្ចប្រជុំប្រទេសមានឧស្សាហកម្មរីកលូតលាស់ G7 នៅប្រទេសកាណាដា ដើម្បីបង្កើនការចំណាយការពារជាតិពីចំនួន ២ភាគរយ ដល់ ៣,៥ភាគរយនៃផលិតផលក្នុងស្រុកសរុប(GDP) ។

អតីតនាយករដ្ឋមន្រ្តីអូស្រ្តាលីលោក Scott Morrison ដែលរលបានកិច្ចព្រមព្រៀង AUKUSកាលពីឆ្នាំ ២០២១ ពេលដែលលោក Joe Bidenនៅជាប្រធានាធិបតីសហរដ្ឋអាមេរិក បាននិយាយប្រាប់ទូរទស្សន៍ Sky News Australiaនាថ្ងៃព្រហស្បតិ៍នេះថា អាមេរិកមានរាល់សិទ្ធិក្នុងការបន្ត និងពិនិត្យមើលអ្វីៗបានគ្រប់ពេល ៕