​កូរ៉េខាងត្បូង​៖ ប្រធានាធិបតី​កូរ៉េខាងត្បូង​លោក Moon Jae-in បាន​លើកលែងទោស​ក្នុងករណី​ពិសេស​ដល់​អតីត​ប្រធានាធិបតីលោកស្រី Park Geun-hye ដែល​កំពុង​ជាប់ពន្ធនាគារ​រយៈពេល ២២ឆ្នាំ​ពាក់ព័ន្ធ​រឿងអាស្រូវ​ពុករលួយ​ដ៏​ធំ​។​ ​ស្ត្រី​វ័យ​ ៦៩​ឆ្នាំ​រូបនេះ​ត្រូវបាន​កាត់ទោស​ពីបទ​រំលោភ​អំណាច​ និង​ការបង្ខិតបង្ខំ​ បន្ទាប់ពី​លោកស្រី​ត្រូវបាន​ចោទប្រកាន់​ក្នុង​ឆ្នាំ២០១៧​។​

​លោកស្រី​ជា​មេដឹកនាំ​ជាប់ឆ្នោត​តាម​លទ្ធិប្រជាធិបតេយ្យ​ដំបូង​គេ ​ក្នុងប្រទេស​របស់លោក​ស្រី​ដែល​ត្រូវបាន​បង្ខំ​ឱ្យ​លាលែង​ពី​តំណែង​។ លោក​ស្រី Park ត្រូវបាន​សម្រាក​ព្យាបាល​នៅ​មន្ទីរពេទ្យ​ ៣ដង​ហើយ​នៅ​ឆ្នាំនេះដោយសារ​ឈឺ​ស្មា ​និង​ខ្នង​រ៉ាំរ៉ៃ។ ​សារព័ត៌មាន​ក្នុងស្រុក Yonhap បាន​និយាយថា លោកស្រី Park ដែល​ស្ថិត​ក្នុងចំណោម​អ្នកទទួលផល​ ពី​ការលើកលែងទោស​ក្នុងករណី​ពិសេស​របស់លោក Moon សម្រាប់​ឆ្នាំ​ថ្មី ត្រូវបាន​ចុះ​ក្នុង​បញ្ជី​ក្រោម​ហេតុផល​សុខភាព​របស់លោក​ស្រី​ចុះខ្សោយ​។​ ​ការប្រកាស​នេះ​បានធ្វើឱ្យ​មានការ​ភ្ញាក់ផ្អើល ខណៈដែល​លោក​ប្រធានាធិបតី Moon Jae-in ធ្លាប់បាន​ច្រានចោល​ការលើកលែងទោស​នេះ​៕

អត្ថបទ៖ សុខមាន