ក្រុមមនុស្សធម៌របស់អង្គការសហប្រជាជាតិ កាលពីថ្ងៃពុធ បានសម្តែងការព្រួយបារម្ភអំពីការកើនឡើងកាន់តែច្រើននៃប្រជាជនភៀសខ្លួននៅខាងក្នុងប្រទេស ដែលបណ្តាលមកពីអំពើហិង្សានៅក្នុងប្រទេសហៃទី។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា មនុស្សជិត ១,៣លាននាក់ បច្ចុប្បន្ននេះ បានភៀសខ្លួនចេញពីលំនៅឋាន នៅទូទាំងប្រទេស ដោយដកស្រង់តួលេខពីអង្គការទេសន្តរប្រវេសន៍អន្តរជាតិ(IOM) ។

វាបានបង្ហាញពីការកើនឡើងចំនួន២៤ភាគរយ ចាប់តាំងពីខែធ្នូ ឆ្នាំ២០២៤។ វាក៏ជាតួលេខខ្ពស់បំផុតមិនធ្លាប់មានដែលបានកត់ត្រាដោយសារតែអំពើហិង្សានៅក្នុងប្រទេសហៃទី។ អង្គការ OCHA បាននិយាយថា ខណៈរដ្ឋធានី ព័រ អូប្រាំង នៅតែជាចំណុចកណ្តាលនៃអំពើហិង្សាក្នុងចំណោមក្រុមប្រដាប់អាវុធ ដោយក្រុមនេះបានពង្រីកខ្លួនចូលទៅកាន់តំបន់ផ្សេងៗ បានបង្កឱ្យប្រជាជនភៀសខ្លួនទ្រង់ទ្រាយធំ។

នៅក្នុងតំបន់មណ្ឌលភាគកណ្តាល ចំនួនជនភៀសខ្លួនបានកើនឡើងទ្វេដងក្នុងរយៈពេលត្រឹមតែប៉ុន្មានខែប៉ុណ្ណោះ ដោយកើនឡើងពី៦៨.០០០នាក់ក្នុងខែធ្នូ ឆ្នាំ២០២៤ ឡើងដល់ជាង១៤៥.០០០នាក់ក្នុងខែមិថុនា ឆ្នាំនេះ។ 

ការិយាល័យបាននិយាយថា គ្រួសារជាច្រើនដែលភៀសខ្លួន ជារឿយៗត្រូវបានបង្ខំឱ្យតាំងទីលំនៅក្នុងទីតាំងក្រៅផ្លូវការ ឬផ្ទះគ្រួសារដែលមានមនុស្សច្រើនលើសលប់។