ទីភ្នាក់ងារជនភៀសខ្លួនរបស់អង្គការសហប្រជាជាតិ (UN) នៅថ្ងៃព្រហស្បតិ៍ (ទី១២ ខែមិថុនា) នេះ បានប្រាប់ឲ្យដឹងថា ចំនួនមនុស្សផ្លាស់ទីលំនៅ ដោយសារសង្រ្គាម និងការធ្វើទុកបុកម្នេញ នៅជុំវិញពិភពលោក បានកើនឡើងលើសពី ១២២លាននាក់ហើយ នៅឆ្នាំនេះ ដោយសារការបរាជ័យមិនអាចដោះស្រាយជម្លោះដែលមានរយៈពេលជាច្រើនឆ្នាំទាំងនោះ ដូចជានៅប្រទេសស៊ូដង់ និងអ៊ុយក្រែនជាដើម ដោយទីភ្នាក់ងារនេះបានកត់សម្គាល់ថា ការផ្ដល់មូលនិធិជួយសង្គ្រោះបានធ្លាក់ចុះដល់កម្រិតឆ្នាំ២០១៥។

យោងតាមរបាយការណ៍របស់ឧត្តមស្នងការអង្គការសហប្រជាជតិទទួលបន្ទុកជនភៀសខ្លួន (UNHCR) លោក Filippo Grandi បានឲ្យដឹងថា មានជនភៀសសឹកជាង ២លាននាក់ទៀត នៅទូទាំងពិភពលោក នាចុងខែមេសា ឆ្នាំ២០២៥ ពោលគឺច្រើនជាងកម្រិតឆ្នាំមុន បើទោះបីជាចំនួនប្រជាជនស៊ីរីត្រលប់ទៅប្រទេសកំណើតវិញមានចំនួនជិតស្មើគ្នា បន្ទាប់ពីរបបគ្រប់គ្រងរបស់លោក Bashar al-Assad ដួលរលំ។

របាយការណ៍នេះបានភ្ជាប់ទៅនឹងការកើនឡើងនៃជម្លោះធំ នៅប្រទេសស៊ូដង់ សហភាពមីយ៉ាន់ម៉ា និងអ៊ុយក្រែន និង «ការបន្តបរាជ័យមិនអាចបញ្ឈប់ការប្រយុទ្ធគ្នាបាន»។ លោក Grandi បានលើកឡើងនៅក្នុងសេចក្តីថ្លែងការណ៍រួមជាមួយនឹងរបាយការណ៍នោះថា៖ «យើងកំពុងរស់នៅក្នុងពេលវេលាប្រែប្រួលខ្លាំង នៅក្នុងទំនាក់ទំនងអន្តរជាតិ ដោយសង្គ្រាមសម័យទំនើប បង្កើតបានជាទិដ្ឋភាពផុយស្រួយ និងគួរឲ្យតក់ស្លុតដែលត្រូវបានសម្គាល់ដោយទុក្ខវេទនាក្រៃលែងរបស់មនុស្សជាតិ»។

UNHCR បានបន្ថែមថា ការកើនឡើងនៃចំនួនជនភៀសខ្លួន កើតមានស្របពេលដែលការផ្តល់មូលនិធិ ដើម្បីជួយពួកគេ បានធ្លាក់ចុះដល់កម្រិត ឆ្នាំ២០១៥ ជាពេលដែលចំនួនសរុបនៃជនភៀសខ្លួន នៅជុំវិញពិភពលោក មានកម្រិតពាក់កណ្តាលនៃចំនួនបច្ចុប្បន្ន៕