នៅក្នុងរបាយការណ៍មួយ នាថ្ងៃព្រហស្បតិ៍ (ទី១២ ខែមិថុនា) នេះ ធនាគារពិភពលោក (WB) បានឲ្យដឹងថា សេដ្ឋកិច្ចរបស់សហភាពមីយ៉ាន់ម៉ា ត្រូវបានគេរំពឹងថា នឹងធ្លាក់ចុះ ២,៥ភាគរយ នៅក្នុងឆ្នាំសារពើពន្ធ ២០២៥-២០២៦ ដែលភាគច្រើនដោយសារតែផលប៉ះពាល់ដ៏បំផ្លិចបំផ្លាញពីគ្រោះរញ្ជួយដី កាលពីចុងខែមីនា។

ធនាគារពិភពលោក បានបញ្ជាក់ថា ការខូចខាតដោយផ្ទាល់ ចំពោះទ្រព្យសម្បត្តិ និងហេដ្ឋារចនាសម្ព័ន្ធនានា ដោយសារតែគ្រោះរញ្ជួយដីកម្រិត ៧,៧រ៉ិចទ័រ ត្រូវបានគេប៉ាន់ប្រមាណមានចំនួន ១១ពាន់លានដុល្លារ ឬ ១៤ភាគរយនៃផលិតផលក្នុងស្រុកសរុប (GDP) របស់ប្រទេសនេះ ដោយបានព្យាករថា ទិន្នផលសេដ្ឋកិច្ច នឹងធ្លាក់ចុះប្រហែល ២ពាន់លានដុល្លារ ដោយសាររញ្ជួយដីនេះ។

ធនាគារពិភពលោក បានបន្ថែមថា គ្រោះរញ្ជួយដីនេះ បានប៉ះពាល់ដល់មនុស្សជាង ១៧លាននាក់ ដោយអ្នករងគ្រោះធ្ងន់ធ្ងរ ៩លាននាក់។ ហើយបើយោងតាមរបបយោធាដែលកំពុងកាន់អំណាចរបស់មីយ៉ាន់ម៉ា បានឲ្យដឹងថា ចំនួនអ្នកស្លាប់ បានមានលើស ៣.៧០០នាក់ អំឡុងពេលមានគ្រោះធម្មជាតិនេះ។

អ្នកនាំពាក្យរបបយោធាមិនបានឆ្លើយតបទៅនឹងការហៅទូរសព្ទពីសារព័ត៌មាន Reuters ដែលកំពុងស្វែងរកការអត្ថាធិប្បាយ លើរបាយការណ៍នេះ។ កាលពីខែធ្នូ ធនាគារពិភពលោក បានព្យាករថា សេដ្ឋកិច្ចរបស់មីយ៉ាន់ម៉ានឹងធ្លាក់ចុះ ១ភាគរយ ក្នុងឆ្នាំសារពើពន្ធ ២០២៤-២០២៥ ដែលបានបញ្ចប់ក្នុងខែមីនា ដោយសារទឹកជំនន់ធ្ងន់ធ្ងរ នៅក្នុងប្រទេស។ សហភាពមីយ៉ាន់ម៉ាបានស្ថិតក្នុងភាពចលាចល ចាប់តាំងពីយោធា បានដណ្តើមអំណាចតាមរយៈរដ្ឋប្រហារ ក្នុងខែកុម្ភៈ ឆ្នាំ២០២១ ជាព្រឹត្តិការណ៍ដែលបង្កឲ្យមានសង្រ្គាមស៊ីវិលរហូរដល់សព្វថ្ងៃនេះ៕