ក្មេងប្រុស Adam Al-Najjar អាយុ ១១ឆ្នាំដែលបានបាត់បង់បងប្អូនបង្កើតរហូតដល់ ៩នាក់នៅក្នុងការវាយប្រហាររបស់អ៊ីស្រាអែលកាលពីខែមុន បានរំឭកដល់រឿងដែលគ្រួសាររបស់គេបានស្លាប់ និងចែករំលែកក្តីសង្ឃឹមសម្រាប់ជីវិតថ្មីជាមួយម្តាយរបស់គេ ។

នៅក្នុងវីដេអូដែលផ្តល់ជូនដោយអង្គការសុខភាពពិភពលោក(WHO) ក្មេងប្រុស Adam និយាយថា រូបគេបានបាត់បង់បងប្រុស និងឪពុក ក្រោយមីស៊ីល ២គ្រាប់វាយប្រហារផ្ទះរបស់ពួកគេ ។

ក្មេងប្រុស Adam និយាយប្រាប់ WHOពីមន្ទីរពេទ្យបណ្តោះអាសន្នស្ថិតនៅភាគខាងត្បូងតំបន់ហ្កាហ្សា មុនពេលចាកចេញទៅកាន់ប្រទេសអ៊ីតាលីថា ដៃរបស់ខ្ញុំបានបាក់ ខ្ញុំបានរងរបួសពេញដៃ និងជើងរបស់ខ្ញុំ ពួកគេបានចាក់ថ្នាំឲ្យខ្ញុំច្រើនណាស់ ដើម្បីព្យាបាលជំងឺរបស់ខ្ញុំ ។

កាលពីថ្ងៃពុធ ក្រុមក្មេងៗប៉ាឡេស្ទីន ១៧នាក់ រួមទាំងក្មេងប្រុស Adam បានធ្វើដំណើរទៅដល់ប្រទេសអ៊ីតាលី សម្រាប់ការព្យាបាល អមដំណើរដោយសមាជិកគ្រួសារជាង ៥០នាក់ ។ យន្តហោះដែលបានចុះចតនៅទីក្រុង Linate ដឹកអនីតិជនប៉ាឡេស្ទីនរងរបួស ៥នាក់ ខណៈ ១១នាក់ផ្សេងទៀតបានធ្វើដំណើរមកដល់តាមជើងហោះហើរផ្សេង នៅអាកាសយានដ្ឋានផ្សេងទៀតរបស់អ៊ីតាលី ។

ការវាយប្រហារនៅថ្ងៃទី ២៣ ខែឧសភា បណ្តាលឲ្យក្មេងប្រុស Adam រងរបួសយ៉ាងធ្ងន់ធ្ងរ និងទទួលបានការព្យាបាលនៅមន្ទីរពេទ្យ Nasser ដែលស្ថិតក្នុងចំណោមមន្ទីរពេទ្យប្រតិបត្តិការតិចតួចប៉ុណ្ណោះ នៅភាគខាងត្បូងតំបន់ហ្កាហ្សា ។

ក្រសួងការបរទេសអ៊ីតាលី និយាយនៅព្រឹកថ្ងៃពុធថា ជនប៉ាឡេស្ទីនយ៉ាងហោច ៧០នាក់ គ្រោងនឹងមកដល់អ៊ីតាលីតាមយន្តហោះយោធា ៣គ្រឿង ដែលចេញដំណើរពីអាកាសយានដ្ឋាន Eilat របស់អ៊ីស្រាអែល ៕