ទីភ្នាក់ងារព័ត៌មាន DPA រាយការណ៍នៅថ្ងៃព្រហស្បតិ៍នេះថា រដ្ឋមន្រ្តីការពារជាតិអាល្លឺម៉ង់លោក Boris Pistorius បានធ្វើដំណើរទៅដល់ទីក្រុងគីវ ដើម្បីពិភាក្សាលើការគាំទ្រអាវុធសម្រាប់អ៊ុយក្រែន នៅក្នុងសង្រ្គាមរបស់ពួកគេជាមួយរុស្ស៊ី ។ 

លោក Pistorius មានគម្រោងចូលរួមកិច្ចប្រជុំជាមួយក្រុមអ្នកតំណាងរដ្ឋាភិបាលអ៊ុយក្រែនជុំវិញជំនួយអាវុធបន្ថែមទៀតពីទីក្រុងប៊ែរឡាំង ។

ពេលមកដល់ស្ថានីយរថភ្លើងនៅកណ្តាលទីក្រុងគីវ លោក Pistorius និយាយថា ជាការពិតណាស់ថា ពួកយើងនឹងពិភាក្សាលើការគាំទ្រអ្វីខ្លះ ដែលអាល្លឺម៉ង់ និងប្រទេសផ្សេងទៀតនៅអឺរ៉ុបនឹងត្រូវផ្តល់ជូននៅពេលអនាគត ។ អ្វីដែលពួកយើងអាចធ្វើបាន ដូចជាវិស័យកិច្ចសហប្រតិបត្តិការឧស្សាហកម្ម ប៉ុន្តែក្នុងលក្ខខណ្ឌគាំទ្រផងដែរ ។

អាល្លឺម៉ង់គឺជាប្រទេសគាំទ្រផ្នែកយោធាធំបំផុតលំដាប់ទី ២របស់អ៊ុយក្រែន បន្ទាប់ពីសហរដ្ឋអាមេរិក ដែលការប្តេជ្ញាចិត្តជួយទីក្រុងគីវរបស់ពួកគេ ក្លាយជាសំណួរចោទ ធ្វើឲ្យមានសម្ពាធលើអឺរ៉ុប ដើម្បីបង្កើនវិធានការ ។

រុស្ស៊ី និងអ៊ុយក្រែន បានជួបពិភាក្សាស្វែងរកសន្តិភាពនៅក្នុងទីក្រុងអ៊ីស្តង់ប៊ុល ប្រទេសទួរគី ក្នុងខែនេះ ក្នុងដំណើរជំរុញថ្មី ដើម្បីដោះស្រាយជម្លោះរបស់ពួកគេ ដែលបានចាប់ផ្តើមឡើងជាមួយការវាយលុករបស់រុស្ស៊ីលើប្រទេសជិតខាងរបស់ខ្លួនកាលពីខែកុម្ភៈ ឆ្នាំ ២០២២ ៕