​បាល់ទាត់៖ ​ក្រុម​វៀតណាម​បាន​ស្គាល់​បរាជ័យ​លើកដំបូង​ក្នុង​រយៈពេល ៥ឆ្នាំ​ចុងក្រោយ​ក្រោម​ស្នាដៃ​ក្រុម​ក្នុង​តំបន់អាស៊ាន ​ក្រោយ​ចាញ់​ថៃ ២-០ យប់មិញ​នៅ​វគ្គ​ពាក់កណ្តាល​ផ្តាច់ព្រ័ត្រ​ជើង​ទី១ AFF Championship​។ ​​ខ្សែបម្រើ​ក្លិប​ជប៉ុន Consadole Sapporo កីឡាករ Chanathip Songkrasin គឺជា​វិ​រៈ​បុរស​ក្នុង​ការប្រកួត​នេះ​ដោយ​រកបាន​ ២​គ្រាប់​ម្នាក់ឯង​ក្នុង​ជ័យជំនះ ២-០ របស់​ថៃ​លើ​ក្រុម​វៀតណាម​នេះ​។

​​គ្រាប់​ដំបូង​របស់​ថៃ​កើតឡើង​ពី​កំហុស​របស់​ខ្សែការពារ​វៀតណាម​នៅ​នាទី​ទី១៤ មុននឹង​គ្រាប់​ទី​ពីរ​កើតឡើង​នៅ​នាទី​ទី២៣​។ ​​Chanathip ក៏មាន​ឱកាស​រកបាន​គ្រាប់ Hat-Trick របស់ខ្លួន​ដែរ​នៅ​ជិត​ចប់​ការប្រកួត​តែ​បាល់ ១១ម៉ែត្រ​របស់គេស៊ុត​មិន​ចូល​ក្រោយ​សង្គ្រោះបាន​ដោយ​អ្នកចាំទី​វៀតណាម Tran Nguyen Manh​។​ ​​ក្រោយ​ចប់​ការប្រកួត​ប្រធាន​ក្រុម​ថៃ Chanathip ឱ្យដឹងថា ពីរ​គ្រាប់​របស់គេ​គឺ​កើតឡើង​ពី​ការសហការ​របស់​ក្រុម​ទាំងមូល ពោលគឺ​កីឡាករ​ក្នុង​ក្រុម​ទាំងអស់​លេង​ដោយ​ទំនុកចិត្ត​។ ​​ចំណែក​គ្រូបង្វឹក​ថៃ​លោក Alexander Polking និយាយថា ២គ្រាប់​នេះ​ជា​លទ្ធផល​ដ៏​មាន​សារសំខាន់​របស់​យើង តែ​មិនទាន់​ចប់​ទេ ពួកយើង​មិនអាច​ភ្លេចខ្លួន​បានទេ​។

​​រីឯ​គ្រូបង្វឹក​វៀតណាម​លោក Park Hang-Seo វិញ​និយាយថា ក្រុម​ទាំងពីរ​លេង​ដោយ​សំពាធ​រៀងខ្លួន ប្រយ័ត្ន​គ្នា​រឿង​ខ្លួន តែ​លោក​មិនសប្បាយចិត្ត​ទេ​ដែល​ពីរ​គ្រាប់​កើតឡើង​ស្រួល​ពេក ដែល​នេះ​ជា​បញ្ហា​របស់​ក្រុម​លោក​។​ ​សូមបញ្ជាក់ថា​ នេះ​ជា​បរាជ័យ​លើកដំបូង​របស់​វៀតណាម​ក្រោម​ស្នាដៃ​ក្រុម​នៅក្នុង​តំបន់​អាស៊ាន ខណៈ​ក្រុម​របស់លោក Park Hang-Soe មិនដែល​ចាញ់​ក្រុម​ក្នុង​តំបន់​ឡើយ​ក្នុង​រយៈពេល ៥ឆ្នាំ​ចុងក្រោយ​រឺ ៣៥ប្រកួត​ជាប់​គ្នា​។ ​ជើង​ទី២ នៃ​វគ្គ​ពាក់កណ្តាល​ផ្តាច់ព្រ័ត្រ​រវាង​ថៃ និង​វៀតណាម​នឹងធ្វើ​ឡើង​នៅ​ថ្ងៃអាទិត្យ​ចុង​សប្តាហ៍​នេះ​៕

​អត្ថបទ​៖​នាង សុភា​វុ​ធ