នៅថ្ងៃព្រហស្បតិ៍នេះ ក្រុមអ្នកស្រុក និងភ្ញៀវទេសចរនៅតំបន់ភាគខាងជើងប្រទេសឥណ្ឌា មើលឃើញអាកាសធាតុក្តៅខ្លាំង ពេលដែលសីតុណ្ហភាពហក់ឡើងខ្ពស់រហូតដល់ជាង ៤០អង្សាសេ ។

តំបន់ទេសចរណ៍ពេញនិយមនៅតាមទីក្រុងជាច្រើន រួមទាំងទីក្រុង Varanasi និងទីក្រុង Chandigarh ប្រៀបបាននឹងតំបន់វាលខ្សាច់ ពេលដែលចំនួនភ្ញៀវធ្លាក់ចុះច្រើន ស្របពេលស្ថានភាពអាកាសធាតុក្តៅខ្លាំង ។

អ្នករត់ទូកទេសចរណ៍មួយរូបដែលសុំមិនបញ្ចេញឈ្មោះ និយាយថា វាពិតជាក្តៅខ្លាំងណាស់ ។ ភ្ញៀវទេសចរឈប់មកកម្សាន្តលេងទៀតហើយ ដោយសារក្តៅខ្លាំងពេក ។ 

លោកថា វាបានធ្វើឲ្យប៉ះពាល់ដល់ជីវិតរស់នៅប្រចាំថ្ងៃរបស់អ្នករត់ទូកទេសចរណ៍នៅទីនេះ ។ អ្នករត់ទូករបស់ពួកយើង មានការព្រួយបារម្ភខ្លាំងណាស់ ពីព្រោះចំនួនភ្ញៀវទេសចរ មានចំនួនកាន់តែតិច ពួកយើងប្រឈមនឹងបញ្ហាច្រើននៃការរកប្រាក់ចំណូលសម្រាប់ជីវិតប្រចាំថ្ងៃ ។

លោក Surinder Paul គឺជាប្រធានការិយាល័យឧតុនិយមក្រុង Chandingarh និយាយថា សីតុណ្ហភាពនៅទីក្រុងរបស់លោកខ្ពស់ជាងសព្វមួយដង ។ ថ្ងៃម្សិលមិញ សីតុណ្ហភាពបានកើនឡើងរហូតដល់ ៤៣,៨អង្សាសេ ហើយរំពឹងថា ថ្ងៃនេះ សីតុណ្ហភាពនឹងបន្តនៅដដែល ។ រយៈពេល ២-៣ថ្ងៃបន្ទាប់ សីតុណ្ហភាពអាចនឹងនៅដដែល ឬអាចនឹងកើនឡើងខ្ពស់ជាងនេះបន្តិចបន្តួច ដូច្នេះហើយ វាពិតជាក្តៅខ្លាំងណាស់ ។

លោកបន្តថា ក្រោយថ្ងៃទី ១៤ ខែមិថុនា សីតុណ្ហភាពអាចនឹងធ្លាក់ចុះទាបបន្តិច ពេលដែលមានពពកច្រើន ហើយស្ថានភាពខ្យល់បក់ ។ ដូច្នេះ មាននូវឱកាសដែលស្ថានភាពអាកាសធាតុ អាចនឹងល្អប្រសើរជាងនេះ នៅក្រោយថ្ងៃទី ១៤ ខែមិថុនា ។

ស្ថិតនៅតំបន់ត្រូពិក តំបន់ភាគច្រើននៃប្រទេសឥណ្ឌា តែងតែមើលឃើញរដូវប្រាំងក្តៅខ្លាំងខុសពីធម្មតា ៕