ប្រព័ន្ធផ្សព្វផ្សាយ បានរាយការណ៍នៅថ្ងៃព្រហស្បតិ៍ (ទី១២ ខែមិថុនា) នេះថា យន្តហោះ Boeing 787-8 របស់ក្រុមហ៊ុនអាកាសចរណ៍ Air India ដែលមានមនុស្សយ៉ាងតិច ២៤២នាក់នៅលើនោះ បានធ្លាក់ភ្លាមៗ បន្ទាប់ពីហោះចេញពីអាកាសយានដ្ឋាន ក្នុងទីក្រុង Ahmedabad របស់ប្រទេសឥណ្ឌា។ ជើងហោះហើរនេះនឹងធ្វើដំណើរទៅកាន់ទីក្រុងឡុងដ្រ៍ ប្រទេសអង់គ្លេស។ 

ហើយបើយោងតាមសេចក្ដីរាយការណ៍បថម បានឲ្យដឹងថា មនុស្សយ៉ាងហោចណាស់ពី ៤០ ទៅ ១១០នាក់ ត្រូវបានបារម្ភថា គ្រោះថ្នាក់ដល់ជីវិត ក្រោយមានឧបទ្ទវហេតុនេះ។

ក្រុមហ៊ុនអាកាសចរណ៍នៅក្នុងសេចក្តីថ្លែងការណ៍មួយ បានឲ្យដឹងថា ជើងហោះហើរលេខ AI 171 បានជាប់ពាក់ព័ន្ធក្នុងឧបទ្ទវហេតុ នៅថ្ងៃនេះ។ តាមរូបភាព បានបង្ហាញឲ្យឃើញពីកម្ទេចកម្ទីដែលឆេះ ដោយមានផ្សែងខ្មៅយ៉ាងក្រាស់ឃ្មឹកហុយឡើងទៅលើមេឃក្បែរអាកាសយានដ្ឋាននោះ។

អ្នកជិះនៅលើយន្តហោះនេះ មានជនជាតិឥណ្ឌា ១៦៩នាក់ អង់គ្លេស ៥៣នាក់ ព័រទុយហ្គាល់ ៧នាក់ និងកាណាដាម្នាក់។

បើតាមសេចក្ដីរាយការណ៍ បានឲ្យដឹងថា យន្តហោះនេះបានធ្លាក់លើផ្ទះសំណាក់របស់គ្រូពេទ្យ។ អាកាសយានដ្ឋាន Ahmedabad ត្រូបានបិទ ហើយជើងហោះហើរផ្សេងទៀតត្រូវបានផ្អាក៕