អ្នកស្រី Neamat Abu Khossa ដែលជាស្រ្តីប៉ាឡេស្ទីនជម្លៀសខ្លួនម្នាក់ រស់នៅក្នុងសំពត់តង់ក្នុងទីក្រុងហ្កាហ្សា ជាមួយកូនតូចៗរបស់គាត់ និយាយថា ពួកយើងគ្មានអ្វីបរិភោគនោះទេ គ្មានអាហារ គ្មានទឹកផឹក គ្មានជីវិត ។

ពេលរៀបរាប់ពីការលំបាកគាត់ប្រឈមក្នុងការទទួលបានជំនួយចិញ្ចឹមគ្រួសាររបស់គាត់ អ្នកស្រី Abu Khossa និយាយថា ពេលពួកយើងធ្វើដំណើរទៅកាន់ផ្ទះបាយស៊ុប អ្នកមានអារម្មណ៍ថា វិញ្ញាណរបស់អ្នកកំពុងនៅមុខឆ្នាំងពេញដោយអាហារដែលអ្នកកំពុងកាន់ តែតាមពិតគ្មាននោះទេ ។

អ្នកស្រីនិយាយថា ប្តីរបស់គាត់ត្រូវបានសម្លាប់អំឡុងសង្រ្គាមនៅហ្កាហ្សា ហើយគាត់ពិតជាពិបាកខ្លាំងណាស់ក្នុងការស្វែងអាហារមកចិញ្ចឹមកូនតូចៗរបស់គាត់ ។

អ៊ីស្រាអែល បានអនុញ្ញាតឲ្យប្រតិបត្តិការចែកចាយជំនួយមានដែនកំណត់ដឹកនាំដោយអង្គការសហប្រជាជាតិ(UN) ចាប់ផ្តើមឡើងវិញនៅថ្ងៃទី ១៩ ខែឧសភា ក្រោយបិទច្រកដែនដីមួយនេះ រយៈពេល ១១សប្តាហ៍ ជាទីដែលក្រុមអ្នកជំនាញព្រមានពីការជិតកើតមានគ្រោះទុរ្ភិក្ស ។ UN រៀបរាប់ថា ជំនួយដែលអនុញ្ញាតឲ្យមាន ដូចធ្លាក់ចូលទឹកសមុទ្រអញ្ចឹងដែរ ។

ក្រៅពីប្រតិបត្តិការរបស់ UN អ៊ីស្រាអែលអនុញ្ញាតមូលនិធិមនុស្សធម៌ហ្កាហ្សា បើកទីតាំងចែកចាយជំនួយរបស់ពួកគេចំនួន ៤កន្លែង ។

អង្គការគាំទ្រដោយអ៊ីស្រាអែល និងអាមេរិកមួយនេះ ចាប់ផ្តើមចែកចាញកញ្ចប់ជំនួយនៅតំបន់ហ្កាហ្សាកាលពីដំណាច់ខែឧសភា គ្រប់គ្រងគំរូថ្មីនៃការចែកចាយជំនួយដែល UNថាពុំគ្រប់គ្រាន់ឡើយ ថាគ្រោះថ្នាក់ និងបំពានច្បាប់ ។

ចាប់តាំងពីពេលនោះមក ក្រសួងសុខាភិបាលគ្រប់គ្រងដោយក្រុមហាម៉ាស និយាយថា ជនប៉ាឡេស្ទីន ១៦៣នាក់ ត្រូវបានសម្លាប់ និងមនុស្ស ១ពាន់ផ្សេងទៀត រងរបួស ពេលពួកគេព្យាយាមទៅទទួលយកប្រអប់ជំនួយ ៕