រដ្ឋមន្ត្រីការពារជាតិអ៊ីស្រាអែលលោក Israel Katz បានប្រកាសនៅថ្ងៃសុក្រសប្ដាហ៍នេះថា កងទ័ពអាកាសអ៊ីស្រាអែលបានបើកការវាយប្រហារដែលបានគ្រោងទុកទៅលើប្រទេសអ៊ីរ៉ង់។ នៅព្រឹកថ្ងៃសុក្រនេះ អ៊ីរ៉ង់ប្រកាសដាក់ប្រទេសក្នុងគ្រាអាសន្ន ស្របពេលមានការវាយប្រហារពីអ៊ីស្រាអែល។ 

នាយករដ្ឋមន្ត្រីអ៊ីស្រាអែល បានបញ្ជាក់ពីប្រតិបត្តិការតោងើប ប្រឆាំងអ៊ីរ៉ង់។ ក្រុមមន្ត្រីយោធាអ៊ីស្រាអែលនិយាយថាការវាយប្រហារនេះ បានដាក់គោលដៅលើកម្មវិធីនុយក្លេអ៊ែរនិងសមត្ថភាពមីស៊ីលរយៈចម្ងាយឆ្ងាយ របស់ទីក្រុងតេអេរ៉ង់។

ប្រព័ន្ធផ្សព្វផ្សាយអ៊ីរ៉ង់ រាយការណ៍ពីការផ្ទុះនៅក្រុងតេអេរ៉ង់ ព្រមទាំងការស្ទាក់ចាប់មីស៊ីល។   

លោក Katz បាននិយាយថា ស្ថានភាពអាសន្នត្រូវបានប្រកាសនៅទូទាំងប្រទេសអ៊ីស្រាអែល។បន្ទាប់ពីការវាយប្រហារដែលបានគ្រោងជាមុនរបស់រដ្ឋអ៊ីស្រាអែលប្រឆាំងនឹងប្រទេសអ៊ីរ៉ង់ ការវាយប្រហារដោយមីស៊ីល និងយានដ្រូនទៅលើរដ្ឋអ៊ីស្រាអែល និងប្រជាជនស៊ីវិលរបស់ខ្លួន ត្រូវគេរំពឹងទុកនៅពេលខាងមុខ ។   

នាយសេនាធិការ នៃកងកម្លាំងប្រដាប់អាវុធរបស់អ៊ីរ៉ង់ ត្រូវបានរាយការណ៍ថា គឺជាគោលដៅនៃការវាយប្រហាររបស់អ៊ីស្រាអែល ។ប្រភពនានាពីអ៊ីរ៉ង់ ពុំទាន់បានបញ្ជាក់ចំពោះរបាយការណ៍ថាលោកត្រូវបានសម្លាប់នៅឡើយទេ។ជាមួយគ្នានោះ គេបានមើលឃើញរូបភាពនៃការដួលរលំអគារមួយនៅក្នុងទីក្រុងតេអេរ៉ង់ ក្រោយការវាយប្រហាររបស់អ៊ីស្រាអែល។ការវាយប្រហារនេះកើតឡើងបន្ទាប់ពីភាពតានតឹងកាន់តែខ្លាំងជាច្រើនសប្តាហ៍ ក្រោយការដួលរលំនៃការចរចាជាថ្មីជុំវិញកម្មវិធីនុយក្លេអ៊ែររបស់អ៊ីរ៉ង់។ សារព័ត៌មានជាច្រើនបានរាយការណ៍កាលពីខែមុនថា អ៊ីស្រាអែលបានពិភាក្សាអំពីការវាយប្រហារដ៏ខ្លាំងក្លាលើទីតាំងនុយក្លេអ៊ែរអ៊ីរ៉ង់ជាមួយសហរដ្ឋអាមេរិក។

ប្រធានាធិបតីអាមេរិកលោក Donald Trump ថ្មីៗនេះបានចោទប្រកាន់ទីក្រុងតេអេរ៉ង់ថាដើរយឺតក្នុងដំណើរការចរចា ហើយបានរំលឹកឡើងវិញថាគោលបំណងរបស់លោកគឺការរំសាយទាំងស្រុងនៃកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានបដិសេធចំពោះការស្វែងរកអាវុធនុយក្លេអ៊ែរ ដោយប្រកាន់ជំហរថាសកម្មភាពនុយក្លេអ៊ែររបស់ខ្លួនគឺសម្រាប់តែគោលបំណងស៊ីវិលប៉ុណ្ណោះ ៕