រដ្ឋមន្ត្រីការបរទេសអាមេរិក លោក Marco Rubio បានបញ្ជាក់កាលពីថ្ងៃព្រហស្បតិ៍ (១២ មិថុនា) ថា សហរដ្ឋអាមេរិក មិនជាប់ពាក់ព័ន្ធអ្វីនៅក្នុងការវាយប្រហាររបស់អ៊ីស្រាអែល ប្រឆាំងនឹងអ៊ីរ៉ង់ទេ ខណៈពេលដែលក៏ជំរុញទីក្រុងតេអេរ៉ង់ កុំឱ្យកំណត់គោលដៅលើផលប្រយោជន៍របស់សហរដ្ឋអាមេរិក ឬបុគ្គលិកនៅក្នុងតំបន់មជ្ឈិមបូព៌ា។

លោក Rubio បាននិយាយនៅក្នុងសេចក្តីថ្លែងការណ៍មួយថា "នៅយប់នេះ អ៊ីស្រាអែល បានចាត់វិធានការឯកតោភាគីប្រឆាំងនឹងអ៊ីរ៉ង់។ សហរដ្ឋអាំមេរិក មិនពាក់ព័ន្ធអ្វីនឹងការវាយប្រហារប្រឆាំងនឹងអ៊ីរ៉ង់នោះទេ ហើយអាទិភាពកំពូលរបស់ទីក្រុងវ៉ាស៊ីនតោន គឺការការពារកងកម្លាំងសហរដ្ឋអាមេរិកនៅក្នុងតំបន់"។ ប្រមុខការទូតអាមេរិករូបនេះបានព្រមានថា "សូមបញ្ជាក់ឱ្យច្បាស់ទៅកាន់អ៊ីរ៉ង់ថា ទីក្រុងតេអេរ៉ង់ មិនគួរកំណត់គោលដៅផលប្រយោជន៍ ឬបុគ្គលិករបស់សហរដ្ឋអាមេរិកឡើយ"។

អ៊ីស្រាអែល បាននិយាយនៅព្រឹកថ្ងៃសុក្រ (១៣ មិថុនា) ថា ខ្លួនវាយប្រហារអ៊ីរ៉ង់ ហើយប្រព័ន្ធផ្សព្វផ្សាយអ៊ីរ៉ង់ បាននិយាយថា ការផ្ទុះជាច្រើនត្រូវបានលាន់ឮនៅក្នុងទីក្រុងតេអេរ៉ង់ ខណៈភាពតានតឹងបានកើនឡើងកាន់តែក្ដៅគគុក ជុំវិញកិច្ចខិតខំប្រឹងប្រែងរបស់សហរដ្ឋអាមេរិក ដើម្បីឈ្នះកិច្ចព្រមព្រៀងរបស់អ៊ីរ៉ង់ ក្នុងការបញ្ឈប់ការផលិតសម្ភារៈសម្រាប់គ្រាប់បែកនុយក្លេអ៊ែរ។

មន្ត្រីយោធាអ៊ីស្រាអែលមួយរូបបាននិយាយថា អ៊ីស្រាអែលកំពុងវាយប្រហារ "រាប់សិប" នៃគោលដៅនុយក្លេអ៊ែរ និងយោធា។ មន្ត្រីអាមេរិកពីររូបដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា អ៊ីស្រាអែល បានបើកការវាយប្រហារលើអ៊ីរ៉ង់ ហើយមិនមានការជួយ ឬការចូលរួមរបស់សហរដ្ឋអាមេរិក នៅក្នុងប្រតិបត្តិការនោះទេ៕