​បាល់ទាត់៖ ​អ្នកចាត់ការ​ក្រុម​បិសាច​ក្រហម Manchester United លោក Ralf Rangnick បាន​បញ្ជាក់ថា ​ស្ថានភាព​របស់​ក្រុមបាន​វិល​មក​សភាព​ធម្មតា​វិញ​ហើយ​ក្រោយ​ផ្ទុះ​ឆ្លង Covid-19 ក្នុង​ក្លិប​មួយរយៈ​ចុងក្រោយ​។ ​ករណី​ឆ្លង​ត្រូវបាន​រកឃើញ​ច្រើន​នៅក្នុង​ក្លិប​ដែលមាន​មូលដ្ឋាន​នៅ​ទីក្រុង Manchester មួយ​នេះ និង​ឈានដល់ការលើក​ពេល​ប្រកួត​ទល់នឹង Brentford និង Brighton​។​

​​បន្ទាប់ពី​រយៈពេល ១៦ថ្ងៃ​កន្លងផុត​ទៅនេះ​ក្រុម​របស់លោក Ralf Rangnick មិនមាន​បញ្ហា​អ្វី​ធំដុំ​ក្នុង​ក្រុម​ឡើយ​មុន​ការប្រកួត​ទល់នឹង Newcastle នៅ​ថ្ងៃទី២៧ ខែធ្នូ​នេះ​ ខណៈ​កីឡាករ​ដែលមាន​បញ្ហា​មានតែ​ម្នាក់​គត់​គឺ Paul Pogba ដែល​កំពុងមាន​របួស​។​ ​អតីត​អ្នកចាត់ការ Leipzig រូបនេះ​បាន​បញ្ជាក់ថា ​កីឡាករ​របស់លោក​មាន​ស្ថានភាព​ល្អប្រសើរ ​នៅពេលនេះពួកគេ​បានធ្វើការ​ហ្វឹកហាត់​នៅផ្ទះ​រៀងៗ​ខ្លួន​បានល្អ ហើយ​នៅពេលនេះ​ពួកគេ​បាន​ហ្វឹកហាត់​រួមគ្នា​វិញ​នៅ​ទីលាន​ Carrington ដែល​ត្រូវបាន​បិទ​ខ្ទប់​ជាង ១០ថ្ងៃ​កន្លងទៅនេះ​។ Manchester United កំពុង​ឈរ​លេខ ៦ ក្នុង​តារាង​មាន ២៧ពិន្ទុ​ក្រោយ​លេង​បាន ១៦ប្រកួត​៕

​អត្ថបទ​៖​នាង សុភា​វុ​ធ