ភ្នំពេញ៖ ព្រឹត្ដិការណ៍ប្រកួតកីឡាវាយកូនគោលពានរង្វាន់សម្តេចតេជោនាយករដ្ឋមន្ត្រី លើកទី៥ នឹងចាប់ផ្តើមនៅថ្ងៃស្អែកនេះ គឺដើម្បីអបអរសាទរខួបវិមានអនុស្សាវរីយ៍នយោបាយឈ្នះ ឈ្នះ និងខួបលើកទី២៣ នៃការបញ្ចប់សង្គ្រោមស៊ីវិលទាំងស្រុងនៅកម្ពុជា។

ព្រឹត្ដិការណ៍នេះ រៀបចំដោយក្រសួងទេសចរណ៍ និងអគ្គស្នងការដ្ឋាននគរបាលជាតិ រួមសហការជាមួយ គណៈកម្មាធិការជាតិអូឡាំពិកកម្ពុជា សហព័ន្ធកីឡាវាយកូនគោលកម្ពុជា ទីលានវាយកូនគោលវឌ្ឍនៈហ្គោលរីស៊ត និងស្ថានីយទូរទស្សន៍បាយ័ន នៅថ្ងៃទី​២៥ ខែធ្នូនេះ ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជា ប្រធានគណៈកម្មាធិការជាតិអូឡាំពិកកម្ពុជា បានឲ្យដឹងថា មកដល់ពេលនេះការរៀបចំបានត្រៀមរួចរាល់អស់ហើយ។

ឯកឧត្តម បានបញ្ជាក់ថា នេះជាការជួបជុំព្រឹត្តិការណ៍កីឡាដ៏ធំ ដែលមានថ្នាក់ដឹកនាំចូលរួម ក្រោយ​ពេលបើកប្រទេសឡើងវិញ ​ទោះប្រភេទកីឡានេះមានហានិភ័យទាប ដោយសារវាយ​នៅ​លើ​ផ្ទៃក្រឡាទីលានធំ​ ប៉ុន្តែយើងនៅតែរក្សា និងអនុវត្តតាមវិធានការការពារ ។

ឯកឧត្តម បន្តថា ការប្រកួតវាយកូនគោលពានរង្វាន់សម្តេចតេជោ នាយករដ្ឋមន្ត្រីនេះ មានការ​ចូលរួម​ចំនួន១១២នាក់​ ក្នុងនោះ​មានការ​ចូលរួមពីបណ្តាអង្គទូតចំនួន៥ ដូចជា ចិន ជប៉ុន មីយ៉ាន់ម៉ា ឥណ្ឌូនេស៊ី ​និងព្រុយណេ​ រួមទាំង​ជំរើសជា​តិ​ចំនួន៨នាក់​ផងដែរ ​ដើម្បីហាត់​សមដៃ​ឆ្ពោះទៅ​កាន់​ការ​ប្រកួត​ស៊ីហ្គេម​នាពេលខាងមុខ។

សូមបញ្ជាក់ថា ក្រសួងទេសចរណ៍​ក៏មានការជំរុញការទាក់ទាញទេសចរ ដោយកន្លងមក​មាន​កញ្ចប់​ទស្សនកិច្ច (Tour Golf) ដែលមានប្រទេសជាច្រើន​បានរៀបចំរួចហើយ ប៉ុន្តែដោយសារបញ្ហាកូវីដ១៩​មានការប៉ះពាល់នាពេលកន្លង ​ប៉ុន្តែក្រសួងរំពឹងថា​ កីឡាកូនគោលនេះ ជាផលិតផលទេសចរណ៍​យ៉ាង​សំ​ខាន់​ ខណៈកម្ពុជាមានសុខសន្តិភាពមានការអភិវឌ្ឍ យើងមានតារាងវាយកូនគោល​ច្រើន​កន្លែង ដូចជានៅភ្នំពេញ ​សៀមរាប​ និងតារាសាគរ ​ខេត្តកោះកុង​ ជាដើម ជាពិសេស​តារាង​វាយកូនគោល​វឌ្ឍនៈហ្គោលរីស៊តនេះក៏ជាតារាង​ដែលធំកម្រិតស្តង់ដារអន្តរជាតិផងដែរ។ នេះបើតាមការបញ្ជាក់បន្ថែមរបស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍៕អត្ថបទ៖ ពៅ រក្សា