កូរ៉េខាងជើងនិយាយថា ខ្លួនបានជួសជុលនាវាពិឃាតលើកទី២ ដែលបានខូច ហើយបានបញ្ជូនចូលក្នុងដែនទឹកដោយជោគជ័យ ក្រោមវត្តមានមេដឹកនាំលោក Kim Jong Un។

ទីភ្នាក់ងារសារព័ត៌មានកណ្តាលរបស់កូរ៉េខាងជើងបាននិយាយថា ខ្លួនបានដំណើរការនាវាពិឃាត ជាលើកទីពីរដែលខ្លួនបានបង្កើតក្នុងឆ្នាំនេះ នៅឯឆ្នេរសមុទ្រភាគខាងកើតប្រទេសនេះកាលពីថ្ងៃព្រហស្បតិ៍សប្ដាហ៍នេះ។សារព័ត៌មាន KCNA បានដកស្រង់សម្តីលោកKim ដោយនិយាយថា នាវាពិឃាតចំនួនពីរគ្រឿងរបស់ប្រទេសនេះ នឹងដើរតួយ៉ាងសំខាន់ក្នុងការធ្វើឱ្យប្រសើរឡើងនូវសមត្ថភាពប្រតិបត្តិការរបស់កងទ័ពជើងទឹកកូរ៉េខាងជើង។

មេដឹកនាំកូរ៉េខាងជើងរូបនេះ បានបញ្ជាក់ជាថ្មីពីការអះអាងកាលពីកន្លងទៅថា ការពង្រឹងសមត្ថភាពកងទ័ពជើងទឹករបស់លោក គឺជាការឆ្លើយតបត្រឹមត្រូវចំពោះការគំរាមកំហែងដែលបង្កឡើងដោយសហរដ្ឋអាមេរិក និងសម្ព័ន្ធមិត្តរបស់ខ្លួននៅអាស៊ី ដែលក្នុងរយៈពេលប៉ុន្មានឆ្នាំចុងក្រោយនេះ បានពង្រីកសមយុទ្ធយោធារួមគ្នារបស់ពួកគេ និងធ្វើបច្ចុប្បន្នភាពយុទ្ធសាស្ត្ររារាំងរបស់ពួកគេ ដើម្បីទប់ទល់នឹងមហិច្ឆតានុយក្លេអ៊ែររបស់លោក Kim ។ 

លោកបាននិយាយថា កូរ៉េខាងជើងនឹងឆ្លើយតរាល់ការគំរាមកំហែងដោយគូប្រជែងរបស់លោកដោយ សកម្មភាពយោធាដ៏លើសលប់ ហើយបានប្តេជ្ញាពង្រឹងកងទ័ពជើងទឹកជាមួយនឹងសមត្ថភាពប្រតិបត្តិការរយៈចម្ងាយឆ្ងាយ ។

កាលពីខែមុន ប្រទេសកូរ៉េខាងជើងបាននិយាយថា នាវាពិឃាតនេះត្រូវបានខូចខាតក្នុងការដំណើរការពុំបានសម្រេច បង្កឱ្យមានការខឹងសម្បារពីលោក Kim ដែលបានប្តេជ្ញាថានឹងពង្រឹងសមត្ថភាពកងទ័ពជើងទឹកខ្លាំងជាងមុន ដើម្បីទប់ទល់នឹងអ្វីដែលលោកហៅថា ការកើនឡើងការគំរាមកំហែងដឹកនាំដោយសហរដ្ឋអាមេរិកប្រឆាំងនឹងប្រទេសរបស់លោក៕