ប្រធានាធិបតីសហរដ្ឋអាមេរិក លោក Donald Trump កាលពីថ្ងៃព្រហស្បតិ៍ បានព្រមានថា លោកអាចនឹងដំឡើងពន្ធលើយានយន្តក្នុងពេលឆាប់ៗនេះ ដោយលើកហេតុផលថា អាចជំរុញឱ្យក្រុមហ៊ុនផលិតរថយន្តបង្កើនល្បឿននៃការវិនិយោគរបស់សហរដ្ឋអាមេរិក។ លោក Trump បាននិយាយនៅក្នុងព្រឹត្តិការណ៍មួយនៅសេតវិមានថា «ខ្ញុំប្រហែលជានឹងដំឡើងពន្ធនោះ នៅពេលអនាគតមិនយូរនោះទេ»។

ក្រុមហ៊ុនផលិតរថយន្ត បាននឹងកំពុងដាក់សម្ពាធលើសេតវិមានដើម្បីកាត់បន្ថយការដំឡើងពន្ធចំនួន ២៥% ដែលលោក Trump បានដាក់លើយានយន្ត។ ក្រុមហ៊ុនផលិតរថយន្តចំនួន៣ នៅទីក្រុងឌីត្រយ (Detroit) រដ្ឋមីឈីហ្គែន បានរិះគន់កិច្ចព្រមព្រៀងដែលនឹងកាត់បន្ថយពន្ធលើការនាំចូលរថយន្តរបស់អង់គ្លេស ប៉ុន្តែពុំមែនលើការនាំចូលផលិតកម្មរបស់ប្រទេសកាណាដា ឬម៉ិកស៊ិក នោះទេ។

លោក Trump បានដកស្រង់សេចក្តីប្រកាសអំពីការវិនិយោគថ្មីៗជាច្រើន រួមទាំងក្រុមហ៊ុន GM ដែលបាននិយាយនៅសប្តាហ៍នេះថា ក្រុមហ៊ុនគ្រោងនឹងវិនិយោគ៤ពាន់លានដុល្លារនៅក្នុងរោងចក្រចំនួនបីរបស់សហរដ្ឋអាមេរិក និងផ្លាស់ប្តូរការផលិតរថយន្ត SUV មួយចំនួនពីប្រទេសម៉ិកស៊ិក។ លោកបាននិយាយផងដែរនូវការវិនិយោគចំនួន២១ពាន់លានដុល្លាររបស់ក្រុមហ៊ុនហ៊ីយ៉ាន់ដាយ(Hyundai) ដែលបានប្រកាសកាលពីខែមីនា រួមមានទាំងរោងចក្រដែកថែបថ្មីរបស់សហរដ្ឋអាមេរិក ផងដែរ។

ក្រុមហ៊ុនផលិតរថយន្តជាច្រើន កំពុងប្រឈមនឹងសម្ពាធតម្លៃកើនឡើងដែលផ្តើមចេញពីការដំឡើងពន្ធ។ ក្នុងប៉ុន្មានសប្តាហ៍ថ្មីៗនេះ ក្រុមហ៊ុន Ford Motor និងក្រុមហ៊ុន Subaru របស់អាមេរិក បានដំឡើងថ្លៃលើម៉ូឌែលមួយចំនួន ដោយសារការចំណាយខ្ពស់ពីពន្ធរបស់លោក Trump ។