រដ្ឋមន្ត្រីការពារជាតិលីបង់ លោក Michel Menassah កាលពីថ្ងៃព្រហស្បតិ៍ បានអំពាវនាវឲ្យមានការបន្តអាណត្តិរបស់កងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL) ដោយពុំមានការកែប្រែ ដោយលើកឡើងពីតួនាទីសំខាន់របស់បេសកកម្មនេះ ក្នុងការរក្សាស្ថិរភាពតាមបណ្តោយព្រំដែនភាគខាងត្បូងរបស់ប្រទេសលីបង់។

លោក Menassah បាននិយាយក្នុងអំឡុងពេលទស្សនកិច្ចទៅកាន់ទីស្នាក់ការកណ្តាលរបស់ UNIFIL នៅទីក្រុង Naqoura ភាគខាងត្បូងប្រទេសលីបង់ថា៖«ការបន្តអាណត្តិរបស់ UNIFIL ដោយគ្មានការកែប្រែ គឺចាំបាច់ ដើម្បីរក្សាសន្តិភាព ដែលបេសកកម្មរបស់អ្នក បានបំពេញអស់ជាច្រើនទសវត្សរ៍មក»។ «យើងសង្ឃឹមថា កិច្ចខិតខំប្រឹងប្រែង ដើម្បីបន្តអាណត្តិទទួលបានជោគជ័យ ដោយធានាឲ្យមានការបន្តនៃការងារសំខាន់របស់អ្នក នៅក្នុងប្រទេសលីបង់»។

នៅឆ្នាំ ២០២៤ ក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេចលេខ ២៧៤៩ ដោយបន្តអាណត្តិរបស់ UNIFIL រហូតដល់ថ្ងៃទី ៣១ ខែសីហា។

លោក Menassah បានបញ្ជាក់ជាថ្មីនូវការប្តេជ្ញាចិត្តរបស់ប្រទេសលីបង់ ក្នុងការអនុវត្តយ៉ាងពេញលេញនូវសេចក្តីសម្រេចលេខ ១៧០១របស់ក្រុមប្រឹក្សាសន្តិសុខអង្គការសហប្រជាជាតិ ដែលបានបញ្ចប់សង្រ្គាមឆ្នាំ ២០០៦ រវាងក្រុមហេសបូឡា និងអ៊ីស្រាអែល។ លោកក៏បានរំលឹកឡើងវិញនូវការត្រៀមខ្លួនរបស់កងទ័ពលីបង់ ក្នុងការសហការជាមួយ UNIFIL ដើម្បីស្តារភាពស្ងប់ស្ងាត់ សម្រួលដល់ការវិលត្រឡប់របស់ជនស៊ីវិលដែលបានផ្លាស់ទីលំនៅ និងគាំទ្រការកសាងឡើងវិញ។

ទោះបីជាកិច្ចព្រមព្រៀងឈប់បាញ់គ្នារវាងក្រុមហេបូឡា និងអ៊ីស្រាអែល បានធ្វើឡើង តាំងពីថ្ងៃទី ២៧ ខែវិច្ឆិកា ឆ្នាំ ២០២៤ ក៏ដោយ ក៏អ៊ីស្រាអែល បានបន្តបើកការវាយប្រហារនៅភាគខាងត្បូងប្រទេសលីបង់។