រដ្ឋមន្ត្រីមួយរូប បាននិយាយនៅក្នុងសេចក្តីថ្លែងការណ៍មួយនៅថ្ងៃសុក្រនេះថា ប្រទេសហ្ស៊កដានី នឹងមិនអនុញ្ញាតឲ្យមានការរំលោភលើដែនអាកាសរបស់ខ្លួនឡើយ ហើយក៏មិនមែនជាកន្លែងប្រយុទ្ធគ្នាសម្រាប់ជម្លោះណាមួយដែរ។

លោក Mohammad Momani រដ្ឋមន្ត្រីក្រសួងទំនាក់ទំនងរដ្ឋាភិបាល និងជាអ្នកនាំពាក្យរដ្ឋាភិបាល បានបន្ថែមថា «សន្តិសុខជាតិរបស់ហ្ស៊កដានី គឺជាបន្ទាត់ក្រហម ហើយព្រះរាជាណាចក្រនេះ នឹងមិនអនុញ្ញាតឲ្យមានការប៉ុនប៉ងណាមួយ ដើម្បីគំរាមកំហែងដល់សន្តិសុខ និងសុវត្ថិភាពរបស់ប្រជាពលរដ្ឋរបស់ខ្លួនឡើយ»។

លោក Momani ក៏បានជំរុញសហគមន៍អន្តរជាតិឲ្យប្រើសម្ពាធ ដើម្បីស្ដារភាពស្ងប់ស្ងាត់ និងការពារកុំមានការកើនឡើងភាពតានតឹងបន្ថែមទៀត ក្នុងតំបន់។

អាជ្ញាធរអាកាសចរណ៍របស់ប្រទេសហ្ស៊កដានី បានបិទដែនអាកាសរបស់ប្រទេសនេះ និងបិទរាល់ជើងហោះហើរទាំងអស់ បន្ទាប់ពីអ៊ីស្រាអែល បានវាយប្រហារអ៊ីរ៉ង់។

អាជ្ញាធរ បាននិយាយនៅក្នុងសេចក្តីថ្លែងការណ៍មួយថា៖«ដែនអាកាសរបស់ព្រះរាជាណាចក្រនេះ ត្រូវបានបិទជាបណ្តោះអាសន្ន ហើយចរាចរណ៍ផ្លូវអាកាស ត្រូវបានផ្អាកសម្រាប់យន្តហោះទាំងអស់ចូល ចេញ និងកំពុងធ្វើដំណើរ ជាការប្រុងប្រយ័ត្នទប់ស្កាត់ហានិភ័យណាមួយ ដែលបណ្តាលមកពីការកើនឡើងភានតឹងក្នុងតំបន់»។