ក្រុមនៃរដ្ឋចំនួន១១ ដែលដឹកនាំដោយរដ្ឋ California របស់សហរដ្ឋអាមេរិក កាលពីថ្ងៃព្រហស្បតិ៍ (១២ មិថុនា) បានប្តឹងជំទាស់នឹងការលុបចោលរបស់សភា នៃច្បាប់រថយន្តអគ្គិសនីឆ្នាំ២០៣៥ របស់រដ្ឋ និងការតម្រូវផ្សេងៗសម្រាប់រថយន្តដឹកទំនិញធុនធ្ងន់។

ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ បានចុះហត្ថលេខាលើសេចក្ដីសម្រេចចំនួន៣ ដែលអនុម័តដោយសមាជិកសភា ដែលរារាំងការលក់រថយន្តអគ្គិសនីរបស់រដ្ឋ California និងច្បាប់ម៉ាស៊ីនម៉ាស៊ូត រួមទាំងផែនការដ៏សំខាន់របស់ខ្លួនក្នុងការបញ្ចប់ការលក់រថយន្តប្រើសាំងត្រឹមឆ្នាំ២០៣៥។

លោក Trump បាននិយាយថា "អាមេរិកជួយសង្គ្រោះជាផ្លូវការនូវឧស្សាហកម្មរថយន្តពីការបំផ្លិចបំផ្លាញ ដោយការបញ្ចប់អាណត្តិរថយន្តអគ្គិសនីនៅ California ឱ្យដាច់ស្រេច"។ លោក Gavin Newsom អភិបាលរដ្ឋ California បានឆ្លើយតបថា "ការវាយប្រហារទាំងអស់របស់លោក Trump លើ California នៅតែបន្ត។ ហើយលើកនេះ លោកពុងបំផ្លាញបរិស្ថានខ្យល់ស្អាតរបស់រដ្ឋ និងការប្រកួតប្រជែងជាសកលរបស់អាមេរិក"។

រដ្ឋទាំងនោះបានដាក់បណ្ដឹងស្នើឱ្យចៅក្រមប្រកាសថា ការលុបចោលរបស់លោក Trump នូវការលើកលែង ដែលចេញដោយទីភ្នាក់ងារការពារបរិស្ថាន ក្រោមការដឹកនាំរបស់លោកអត្តីប្រធានាធិបតី Joe Biden មិនមានឥទ្ធិពលលើច្បាប់នៃការបំភាយឧស្ម័នរបស់រដ្ឋនោះទេ។ គួរឱ្យដឹងថា វិធានការរបស់លោក Biden នោះបានអនុញ្ញាតឱ្យរដ្ឋ California មានសិទ្ធិកំណត់ថា យ៉ាងហោចណាស់ ៨០% នៃរថយន្តថ្មីដែលលក់ក្នុងរដ្ឋ ត្រូវប្រើអគ្គិសនីត្រឹមឆ្នាំ២០៣៥ ដោយនៅសល់គឺរថយន្តបែបកូកាត់សាំងលាយអគ្គិសនី Plug-in Hybrid៕