អ៊ីស្រាអែលបានបើកការវាយប្រហារលើអ៊ីរ៉ង់ នៅថ្ងៃសុក្រ (ទី១៣ ខែមិថុនា) នេះ ដោយផ្តោតលើទីតាំងនុយក្លេអ៊ែរ រោងចក្រមីស៊ីល និងមេបញ្ជាការយោធា ហើយប្រព័ន្ធផ្សព្វផ្សាយ និងសាក្សីរបស់អ៊ីរ៉ង់ បានរាយការណ៍ពីការផ្ទុះនានា ក្នុងនោះរួមទាំងនៅរោងចក្រចម្រាញ់សារធាតុអ៊ុយរ៉ានីញ៉ូមដ៏សំខាន់របស់ប្រទេសផងដែរ។ 

ដោយបានហៅវាថា ជា «ពេលវេលាដ៏សំខាន់មួយ ក្នុងប្រវត្តិសាស្ត្រអ៊ីស្រាអែល» នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ប្រទេសក៏កំពុងកំណត់គោលដៅលើអ្នកវិទ្យាសាស្ត្រនុយក្លេអ៊ែរអ៊ីរ៉ង់ នៅក្នុងប្រតិបត្តិការដែលនឹងបន្តធ្វើជាច្រើនថ្ងៃទៀត។ អ៊ីរ៉ង់ដែលបានប្តេជ្ញាសងសឹកនោះ បានអះអាងជាយូរមកហើយថា សកម្មភាពទាក់ទងនឹងនុយក្លេអ៊ែររបស់ខ្លួន គឺក្នុងគោលបំណងសន្តិភា។

បណ្ដាមេដឹកនាំ និងឥស្សរជនជាន់ខ្ពស់របស់ពិភពលោក បានចេញមកប្រតិកម្ម ចំពោះការសម្រេចចិត្តរបស់អ៊ីស្រាអែល ក្នុងការបើកការវាយប្រហារនេះ។ 

រដ្ឋមន្ត្រីការបរទេសអាមេរិក លោក Marco Rubio បានបញ្ជាក់ពីការមិនជាប់ពាក់ព័ន្ធរបស់សហរដ្ឋអាមេរិកថា៖ «យប់នេះ អ៊ីស្រាអែលបានចាត់វិធានការឯកតោភាគី ចំពោះអ៊ីរ៉ង់។ យើងមិនពាក់ព័ន្ធនឹងការវាយប្រហារនេះទេ ហើយអាទិភាពចម្បងរបស់យើង គឺការការពារកងកម្លាំងអាមេរិក នៅក្នុងតំបន់»។ រដ្ឋមន្ត្រីការបរទេសអូស្ត្រាលី លោកស្រី Penny Wong បានលើកឡើងថា៖ «អូស្ត្រាលីបារម្ភ ចំពោះការកើនឡើងនូវភាពតានតឹង រវាងអ៊ីស្រាអែល និងអ៊ីរ៉ង់។ នេះបង្កជាហានិភ័យឲ្យមានអស្ថិរភាពដល់តំបន់ដែលប្រែប្រួលរួចហើយ។ យើងសូមអំពាវនាវឲ្យភាគីទាំងអស់ជៀសវាងសកម្មភាព និងវោហាសាស្ត្រដែលនឹងនាំឲ្យភាពតានតឹងឡើងកម្ដៅខ្លាំងឡើងៗ»។ 

នាយករដ្ឋមន្រ្តីនូវ៉ែលហ្សេឡង់ លោក Christopher Luxon បាននិយាយថា៖ «វាគឺជាព្រឹត្តិការណ៍មិនគួរឲ្យរីករាយ នៅតំបន់មជ្ឈិមបូព៌ា។ ហានិភ័យនៃវាយតម្លៃមិនបានត្រឹមត្រូវ គឺខ្ពស់ណាស់។ តំបន់នោះមិនត្រូវការឲ្យមានសកម្មភាពយោធាទៀតទេ»។ នាយខុទ្ទកាល័យរបស់ជប៉ុន លោក Yoshimasa Hayashi បានប្រាប់ថា៖ «ប្រទេសជប៉ុនបន្តកិច្ចប្រឹងប្រែងការទូតចាំបាច់ទាំងអស់ ដើម្បីទប់ស្កាត់កុំឲ្យមានស្ថានភាពកាន់តែយ៉ាប់យ៉ឺនបន្ថែមទៀត ខណៈដែលអនុវត្តរាល់វិធានការ ដើម្បីការពារពលរដ្ឋជប៉ុន»។ 

អ្នកនាំពាក្យរបស់អគ្គលេខាធិការអង្គការសហប្រជាជាតិ (UN) លោក Antonio Guterres បានលើកឡើងថា៖ «លោកអគ្គលេខាធិការថ្កោលទោសរាល់ការបង្កើនភាពតានតឹងផ្នែកយោធា នៅមជ្ឈិមបូព៌ា។ លោកបារម្ភជាពិសេស ចំពោះការវាយប្រហាររបស់អ៊ីស្រាអែលលើអ៊ីរ៉ង់ ខណៈដែលការពិភាក្សា រវាងអ៊ីរ៉ង់ និងសហរដ្ឋអាមេរិក ស្តីពីស្ថានភាពកម្មវិធីនុយក្លេអ៊ែររបស់អ៊ីរ៉ង់ កំពុងដំណើរការ។ លោកអគ្គលេខាធិការអំពាវនាវឲ្យភាគីទាំង២ អនុវត្តការអត់ធ្មត់ឲ្យបានខ្ពស់បំផុត»។ 

រដ្ឋាភិបាលអូម៉ង់ ដែលកំពុងសម្របសម្រួលកិច្ចចរចានុយក្លេអ៊ែរអ៊ីរ៉ង់-អាមេរិក បានលើកឡើងថា៖ «អូម៉ង់ចាត់ទុកវិធានការនេះថា ជាករបង្កើននូវភាពតានតឹងដ៏គ្រោះថ្នាក់ ដោយមិនមានការប្រុងប្រយ័ត្ន ដែលតំណាងឲ្យការរំលោភលើធម្មនុញ្ញ UN ដែលជាគោលការណ៍នៃច្បាប់អន្តរជាតិ។ អាកប្បកិរិយាឈ្លានពាននេះ មិនអាចទទួលយកបាន ហើយវាធ្វើឲ្យមានអស្ថិរភាពដល់សន្តិភាព និងសន្តិសុខក្នុងតំបន់»៕