រដ្ឋបាលរបស់ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (ទី១២ ខែមិថុនា) បាន ព្យាយាមបង្ហាញថា សហរដ្ឋអាមេរិកមិនជាប់ពាក់ព័ន្ធនឹងវាយប្រហាររបស់អ៊ីស្រាអែលលើប្រទេសអ៊ីរ៉ង់នោះឡើយ ជាការវាយប្រហារដែលទំនងជាធ្វើឲ្យស្មុគស្មាញដល់ការជំរុញរបស់លោក Trump ដើម្បីឲ្យមានកិច្ចព្រមព្រៀងនុយក្លេអ៊ែរជាមួយទីក្រុងតេអេរ៉ង់។

អ៊ីស្រាអែល បានឲ្យដឹងថា ខ្លួនបានវាយប្រហារគោលដៅនុយក្លេអ៊ែរអ៊ីរ៉ង់ ដើម្បីរារាំងទីក្រុងតេអេរ៉ង់កុំឲ្យអភិវឌ្ឍអាវុធបរមាណូ បើទោះជារដ្ឋបាលលោក Trump កំពុងរៀបចំកិច្ចចរចាជុំទី៦ នៅថ្ងៃទី១៥ ខែមិថុនា ស្តីពីកម្មវិធីចម្រាញ់សារធាតុអ៊ុយរ៉ានីញ៉ូមដែលកំពុងកើនឡើងរបស់ទីក្រុងតេអេរ៉ង់។

លោក Marco Rubio រដ្ឋមន្ត្រីការបរទេស និងជាទីប្រឹក្សាសន្តិសុខជាតិរបស់លោក Trump បានសង្កត់ធ្ងន់ថា ការវាយប្រហាររបស់អ៊ីស្រាអែល គឺជាការធ្វើឡើងឯកតោភាគី ខណៈប្រាប់ថា សហរដ្ឋអាមេរិកបានដឹងថា ការវាយប្រហារនឹងកើតឡើង។

លោក Rubio បានបញ្ជាក់នៅក្នុងសេចក្តីថ្លែងការណ៍មួយថា៖ «យើងមិនពាក់ព័ន្ធនឹងការវាយប្រហារលើអ៊ីរ៉ង់នោះទេ ហើយអាទិភាពចម្បងរបស់យើង គឺការការពារកងកម្លាំងអាមេរិក នៅក្នុងតំបន់។ អ៊ីស្រាអែលបានប្រាប់យើងថា ពួកគេជឿថា វិធានការនេះ គឺចាំបាច់ ដើម្បីការការពារខ្លួន»។

គួរបញ្ជាក់ថា ប៉ុន្មានម៉ោងមុនការវាយប្រហារ លោក Trump បានជំរុញឲ្យមានដំណោះស្រាយការទូតចំពោះភាពតានតឹង ខណៈបាននិយាយថា ការវាយប្រហារលើអ៊ីរ៉ង់ «ទំនងអាចកើតឡើង»៕