ប្រទេសចិនបានចេញសេចក្តីណែនាំដល់ពលរដ្ឋរបស់ខ្លួន ទាំងនៅក្នុងប្រទេសអ៊ីស្រាអែល និងអ៊ីរ៉ង់ អំពីស្ថានភាពសន្តិសុខ «ស្មុគស្មាញ និងធ្ងន់ធ្ងរ» នៅក្នុងប្រទេសទាំងនោះ នៅថ្ងៃសុក្រ (ទី១៣ ខែមិថុនា) នេះ ដោយបន្ថែមការព្រមានដល់ប្រជាជន ក្នុងប្រទេសអ៊ីស្រាអែលឲ្យត្រៀមខ្លួន សម្រាប់ការវាយប្រហារដោយមីស៊ីល និងយានដ្រូន។

ស្ថានទូតចិនប្រចាំប្រទេសអ៊ីស្រាអែល បានប្រាប់ពលរដ្ឋនៅទីនោះឲ្យពង្រឹងការប្រុងប្រយ័ត្នផ្នែកសន្តិសុខរបស់ពួកគេ ជៀសវាងការចេញទៅក្រៅដោយមិនចាំបាច់ ឬទៅកាន់តំបន់ ជុំវិញអង្គភាពយោធា និងស្ថាប័នរសើប ដោយសារ «ស្ថានភាពសន្តិសុខនៅលើដីមានភាពស្មុគស្មាញ និងធ្ងន់ធ្ងរ»។

តាមរយៈបង្ហោះនៅលើគណនីបណ្ដាញសង្គម WeChat របស់ខ្លួន សេចក្តីជូនដំណឹង បានឲ្យដឹងថា «រក្សាភាពស្ងប់ស្ងាត់ និងប្រុងប្រយ័ត្ន» ដោយដាស់តឿនពលរដ្ឋឲ្យត្រៀមខ្លួន ដើម្បីការពារចំពោះមីស៊ីល គ្រាប់រ៉ូកែត យានដ្រូន និងការវាយប្រហារផ្សេងៗទៀត។

នៅក្នុងសេចក្តីជូនដំណឹងដាច់ដោយឡែកមួយទៀត ស្ថានទូតចិនប្រចាំនៅអ៊ីរ៉ង់ ក៏បានណែនាំដល់ពលរដ្ឋ និងសហគ្រាសដែលមានមូលដ្ឋាននៅទីនោះ យកចិត្តទុកដាក់លើការវិវត្ត និងបង្កើនការយល់ដឹង និងការប្រុងប្រយ័ត្នផ្នែកសន្តិសុខរបស់ពួកគេ ដោយស្នើឲ្យពលរដ្ឋជៀសវាងទីតាំងរសើប និងកន្លែងដែលមានមនុស្សច្រើន។

គួរបញ្ជាក់ថា អ៊ីស្រាអែលនៅថ្ងៃសុក្របានឲ្យដឹងថា ខ្លួនបានកំណត់គោលដៅលើទីតាំងនុយក្លេអ៊ែររបស់អ៊ីរ៉ង់ រោងចក្រមីស៊ីលផ្លោង និងមេបញ្ជាការយោធា ជាការចាប់ផ្តើមនូវអ្វីដែលខ្លួនបានព្រមានថា នឹងជាប្រតិបត្តិការរយៈពេលវែង ដើម្បីរារាំងទីក្រុងតេអេរ៉ង់កុំឲ្យផលិតអាវុធបរមាណូ៕