អធិការបតីអាល្លឺម៉ង់ លោក Friedrich Merz បានឲ្យដឹងនៅក្នុងសេចក្តីថ្លែងការណ៍មួយថា នាយករដ្ឋមន្ត្រីអ៊ីស្រាអែល លោក Benjamin Netanyahu បានជូនដំណឹងដល់លោក អំពីការវាយប្រហាររបស់អ៊ីស្រាអែលលើអ៊ីរ៉ង់ អំឡុងការជជែកតាមទូរសព្ទ នៅព្រឹកថ្ងៃសុក្រ (ទី១៣ ខែមិថុនា) នេះ។

សេចក្តីថ្លែងការណ៍នោះបានបញ្ជាក់ថា អ៊ីស្រាអែលមានសិទ្ធិការពារខ្លួន ហើយអ៊ីរ៉ង់មិនគួរបង្កើតអាវុធនុយក្លេអ៊ែរទេ ប៉ុន្តែលោក Merz បានអំពាវនាវឲ្យភាគីទាំង២ បញ្ចៀសបង្កើនភាពតានតឹង។

គួរបញ្ជាក់ថា អ៊ីស្រាអែលបានបើកការវាយប្រហារលើអ៊ីរ៉ង់ នៅថ្ងៃសុក្រនេះ ដោយបានប្រាប់ថា ខ្លួនបានកំណត់គោលដៅលើទីតាំងនុយក្លេអ៊ែរ រោងចក្រមីស៊ីលបាលីស្ទិក និងមេបញ្ជាការយោធា ក្នុងអំឡុងពេលចាប់ផ្តើមប្រតិបត្តិការ ដើម្បីរារាំងទីក្រុងតេអេរ៉ង់កុំឲ្យផលិតអាវុធបរមាណូ។

ក្រោយកើតមានព្រឹត្តិការណ៍នេះ លោក Merz បាននិយាយថា អាល្លឺម៉ង់កំពុងសម្របសម្រួលយ៉ាងជិតស្និទ្ធជាមួយដៃគូ ជាពិសេសសហរដ្ឋអាមេរិក អង់គ្លេស និងបារាំង។ ហើយជាមួយគ្នានេះ លោកបានសង្កត់ធ្ងន់ថា៖ «យើងអំពាវនាវឲ្យភាគីទាំង២ អត់ធ្មត់កុំចាត់វិធានការ ដែលអាចនាំឲ្យមានការកើនឡើងនូវភាពតានតឹងបន្ថែមទៀត និងធ្វើឲ្យតំបន់ទាំងមូលមានអស្ថិរភាព»។

សេចក្តីថ្លែងការណ៍នោះ បានបញ្ជាក់បន្ថែមថា លោក Merz បានកោះប្រជុំគណៈរដ្ឋមន្ត្រីសន្តិសុខ ដែលបានយល់ព្រមឲ្យចាត់វិធានការប្រុងប្រយ័ត្នចាំបាច់ទាំងអស់ ដើម្បីការពារពលរដ្ឋអាល្លឺម៉ង់ នៅក្នុងប្រទេសអ៊ីស្រាអែល អ៊ីរ៉ង់ និងតំបន់ និងដើម្បីបង្កើនការការពារ ចំពោះទីតាំងមានជនជាតិជ្វីហ្វ និងអ៊ីស្រាអែល៕