លោក Rafael Grossi គឺជាប្រធានក្រុមឃ្លាំមើលនុយក្លេអ៊ែរអង្គការសហប្រជាជាតិ(IAEA)និយាយនៅថ្ងៃសុក្រនេះថា អ៊ីរ៉ង់ រាយការណ៍ថាគ្មានកម្រិតវិទ្យុសកម្មកើនឡើងនោះទេ ហើយលោកត្រៀមខ្លួនរួចរាល់ក្នុងការធ្វើដំណើរទៅកាន់អ៊ីរ៉ង់ ដើម្បីវាយតម្លៃស្ថានភាពនៅទីនោះ ក្រោយអ៊ីស្រាអែលបើកការវាយប្រហារលើទីតាំងនុយក្លេអ៊ែរនៅទីក្រុង Natanz ។

លោក Grossi និយាយថា អ៊ីរ៉ង់រាយការណ៍ផងដែរថា នៅពេលនេះ ទីតាំងនៅទីក្រុង Isfahan និងទីក្រុង Fordow មិនរងផលប៉ះពាល់នោះទេ ហើយដំណើរវិវត្តន៍ចុងក្រោយនេះ ធ្វើឲ្យលោកមានក្តីបារម្ភជាខ្លាំង ។

លោកបានជំរុញឲ្យភាគីទាំងអស់បន្តភាពអត់ធ្មត់ក្នុងកម្រិតអតិបរមា ដើម្បីចៀសវាងការឡើងកម្តៅភាពតានតឹងបន្ថែមទៀត ។

លោក Grossi បញ្ជាក់ទៀតថា IAEA នឹងបន្តតាមដានយ៉ាងដិតដល់ស្ថានភាពមួយនេះ ហើយត្រៀមខ្លួនរួចរាល់ក្នុងការផ្តល់ជំនួយបច្ចេកទេស និងបន្តប្តេជ្ញាចិត្តចំពោះសុវត្ថិភាព សន្តិសុខនុយក្លេអ៊ែរ ហើយនិងការពារតម្រូវការអនុវត្តវិធានការគ្រប់កាលៈទេសៈទាំងអស់ ៕