ទីភ្នាក់ងារព័ត៌មាន Tasnim របស់អ៊ីរ៉ង់ បានរាយការណ៍ថា កងកម្លាំងអ៊ីស្រាអែល បានបើកការវាយប្រហារថ្មីលើទីក្រុងភាគពាយ័ព្យ Tabriz របស់ប្រទេសអ៊ីរ៉ង់ ។

យោងតាមសេចក្តីរាយការណ៍របស់សារព័ត៌មានអ៊ីរ៉ង់ បានឲ្យដឹងថា បច្ចុប្បន្នទីក្រុង Tabriz ស្ថិតក្រោមការវាយប្រហារធ្ងន់ធ្ងរពីអ៊ីស្រាអែល ។ ការវាយប្រហារនេះ បានកើតឡើងនៅវេលាម៉ោង ១២ និង ៣០នាទីយប់រំលងអធ្រាត្រ ម៉ោងក្នុងស្រុក ថ្ងៃសុក្រ ។

រូបថតសន្លឹកដែលបានបញ្ចេញនៅលើបណ្តាញព័ត៌មានសង្គម ឃើញសំណុំផ្សែងយ៉ាងក្រាស់ ផុសលើអាកាសចេញពីអាកាសយានដ្ឋានមួយកន្លែងនៅជិតទីក្រុង Tabriz ។

ទីភ្នាក់ងារព័ត៌មានជាច្រើន រាយការណ៍ដែរថា ទីតាំងដែលបានក្លាយជាគោលដៅវាយប្រហារ ត្រូវបានគេជឿថាជាមូលដ្ឋានទ័ពអាកាស Shahid Fakuri ដែលមានផ្ទុកយន្តហោះចម្បាំង ។

អ៊ីស្រាអែល និយាយថា ពួកគេមានគោលដៅលើទីតាំងនុយក្លេអ៊ែរអ៊ីរ៉ង់ រោងចក្រផលិតមីស៊ីលបាលីស្ទិក និងទីបញ្ជាការរបស់អ៊ីរ៉ង់ នៅក្នុងប្រតិបត្តិការរយៈវែង ដើម្បីរារាំងទីក្រុងតេអេរ៉ង់ពីការផលិតអាវុធអាតូមិក ៕