ក្រុមអ្នកស៊ើបអង្កេត នៅថ្ងៃសុក្រ (ទី១៣ ខែមិថុនា) នេះ បានរកឃើញឧបករណ៍ថតសំឡេងប្រអប់ខ្មៅមួយពីកន្លែងកើតឧបទ្ទវហេតុយន្តហោះដឹកអ្នកដំណើរឆ្ពោះទីក្រុងឡុងដ្រ៍ ប្រទេសអង់គ្លេស ដែលបានធ្លាក់ចូលតំបន់លំនៅឋាននៃទីក្រុង Ahmedabad របស់ប្រទេសឥណ្ឌា ដោយហេតុការណ៍នេះបានបណ្ដាលឲ្យមនុស្សយ៉ាងហោចណាស់ ២៦៥នាក់បាត់បង់ជីវិត ទាំងនៅលើយន្តហោះ និងនៅលើដី។

យន្តហោះ Boeing 787-8 របស់ក្រុមហ៊ុនអាកាសចរណ៍ Air India បានចេញសញ្ញាព្រមានមួយភ្លែត មុនពេលវាធ្លាក់នៅម៉ោងអាហារថ្ងៃត្រង់ កាលពីថ្ងៃព្រហស្បតិ៍ (ទី១២ ខែមិថុនា) បន្ទាប់ពីហោះឡើងបានចម្ងាយ ១០០ម៉ែត្រពីដី។

បុរសម្នាក់នៅលើយន្តហោះដែលដឹកអ្នកដំណើរ និងបុគ្គលិកចំនួន ២៤២នាក់ បានរួចជីវិតដោយអព្ភូតហេតុពីការធ្លាក់ដ៏គួររន្ធត់ក្រៃលែងនេះ ដែលបានបន្សល់ទុកត្រឹមតែបំណែកកន្ទុយយន្តហោះលយចេញពីជាន់ទី ២ នៃអន្តេវាសិកដ្ឋាន សម្រាប់បុគ្គលិកពេទ្យពីមន្ទីរពេទ្យក្បែរនោះ។

ស្នងការរងនគរបាល លោកស្រី Kanan Desai បាននិយាយថា រហូតមកដល់ពេលនេះ សពជនរងគ្រោះចំនួន ២៦៥នាក់ ត្រូវបានបញ្ជាក់អះអាង ដែលបង្ហាញថា យ៉ាងហោចណាស់មនុស្ស ២៤នាក់ បានបាត់បង់ជីវិតនៅលើដី។ ចំនួនអ្នកស្លាប់អាចកើនឡើងទៀត នៅពេលដែលបំណែករាងកាយកាន់តែច្រើនត្រូវបានរកឃើញ។

ក្រុមហ៊ុនអាកាសចរណ៍ Air India បានឲ្យដឹងថា មានអ្នកដំណើរជនជាតិឥណ្ឌា ១៦៩នាក់ អង់គ្លេស ៥៣នាក់ ព័រទុយហ្គាល់ ៧នាក់ និងជនជាតិកាណាដាម្នាក់ នៅលើជើងហោះហើរដែលធ្វើដំណើរឆ្ពោះទៅអាកាសយានដ្ឋាន Gatwick នៃទីក្រុងឡុងដ្រ៍ ខណៈទាំងអ្នកបើកយន្តហោះ និងបុគ្គលិកបម្រើការ មាន ១២នាក់៕