បើតាមសេចក្តីថ្លែងការណ៍ដែលបង្ហោះនៅលើគេហទំព័ររបស់ស្ថានទូត នាថ្ងៃសុក្រ (ទី១៣ ខែមិថុនា) នេះ បានឲ្យដឹងថា អ៊ីស្រាអ៊ែលកំពុងបិទស្ថានទូតរបស់ខ្លួន នៅជុំវិញពិភពលោក ហើយបានជំរុញឲ្យពលរដ្ឋប្រុងប្រយ័ត្ន និងកុំបង្ហាញនិមិត្តសញ្ញារបស់ជនជាតិជ្វីហ្វ ឬអ៊ីស្រាអែល នៅកន្លែងសាធារណៈ ដោយការសម្រេចនេះកើតមានឡើងបន្ទាប់ពីអ៊ីស្រាអែលបានបើកការវាយប្រហារទ្រង់ទ្រាយធំលើអ៊ីរ៉ង់។

សេចក្តីថ្លែងការណ៍នោះបានបញ្ជាក់ថា អ៊ីស្រាអែលនឹងមិនផ្តល់សេវាកុងស៊ុល និងបានជំរុញពលរដ្ឋឲ្យសហការជាមួយសេវាសន្តិសុខ ក្នុងតំបន់ ប្រសិនបើជួបប្រទះសកម្មភាពអរិភាព។

មិនមានការកំណត់ពេលវេលា សម្រាប់រយៈពេលដែលស្ថានទូត នឹងត្រូវបិទនោះឡើយ។ បុគ្គលម្នាក់ដែលលើកទូរសព្ទ នៅស្ថានទូត ក្នុងទីក្រុងប៊ែរឡាំង ប្រទេសអាល្លឺម៉ង់ មិនបានផ្តល់ព័ត៌មានលម្អិតបន្ថែមអ្វីឡើយ។ សេចក្តីថ្លែងការណ៍បានរៀបរាប់ថា៖ «ដោយមើលឃើញពីការវិវត្ត នាពេលថ្មីៗនេះ បេសកកម្មរបស់អ៊ីស្រាអែល នៅជុំវិញពិភពលោក នឹងត្រូវបិទ ហើយសេវាកម្មកុងស៊ុល នឹងមិនត្រូវបានផ្តល់ជូននោះទេ»។

អធិការបតីអាល្លឺម៉ង់ លោក Friedrich Merz ដែលបាននិយាយជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃសុក្រនេះ បានប្រាប់ឲ្យដឹងថា ប្រទេសអាល្លឺម៉ង់កំពុងបង្កើនការការពារដល់ទីកន្លែងមានជនជាតិជ្វីហ្វ និងអ៊ីស្រាអែល។

សាក្សីរបស់សារព័ត៌មាន Reuters បាននិយាយថា គេឃើញសន្តិសុខត្រូវបានរឹតបន្តឹង នៅខាងក្រៅវិហារដ៏ធំរបស់ជនជាតិជ្វីហ្វ ក្នុងទីក្រុង Stockholm របស់ប្រទេសស៊ុយអែត ដោយមានរថយន្តនគរបាលចតនៅជិតនោះ៕