ចក្រភពអង់គ្លេស នៅថ្ងៃសុក្រ (ទី១៣ ខែមិថុនា) នេះ បានធ្វើបច្ចុប្បន្នភាពនៃការណែនាំរបស់ខ្លួន អំពីការធ្វើដំណើរទៅកាន់ប្រទេសអ៊ីស្រាអែល ដោយលើកឡើងថា ស្ថានភាពតានតឹងអាចកើនឡើងយ៉ាងឆាប់រហ័ស បន្ទាប់ពីមានការវាយប្រហាររបស់អ៊ីស្រាអែល លើទីតាំងនុយក្លេអ៊ែរ និងយោធា នៅក្នុងប្រទេសអ៊ីរ៉ង់។

ការធ្វើបច្ចុប្បន្នភាពនៅលើគេហទំព័ររបស់រដ្ឋាភិបាល បានឲ្យដឹងថា៖ «ស្ថានភាពតានតឹងអាចកើនឡើងយ៉ាងឆាប់រហ័ស ហើយអាចបង្កឲ្យមានហានិភ័យយ៉ាងខ្លាំងក្លា ក្នុងនោះរួមទាំងការបាញ់មីស៊ីលផងដែរ»។ ការព្រមានដូចគ្នានេះ ត្រូវបានបន្ថែមទៅក្នុងការណែនាំរបស់ខ្លួន សម្រាប់ដែនដីកាន់កាប់ប៉ាឡេស្ទីនផងដែរ។

ជាមួយគ្នានេះ ចក្រភពអង់គ្លេសក៏បានចេញសេចក្តីណែនាំឡើងវិញផងដែរ អំពីការធ្វើដំណើរ សម្រាប់ប្រទេសផ្សេងទៀត ដែលរួមមានអ៊ីរ៉ង់ អ៊ីរ៉ាក់ អេហ្ស៊ីប និងស៊ីរី ដើម្បីរួមបញ្ចូលទៅក្នុងការព្រមាន អំពីហានិភ័យនៃការកើនឡើងនូវភាពតានតឹងដែលកាន់តែរីកធំឡើងៗ។

គួរបញ្ជាក់ថា អ៊ីស្រាអែលបានបើកការវាយប្រហារលើអ៊ីរ៉ង់ នៅថ្ងៃសុក្រនេះ ដោយបានប្រាប់ថា ខ្លួនបានកំណត់គោលដៅលើទីតាំងនុយក្លេអ៊ែរ រោងចក្រមីស៊ីលបាលីស្ទិក និងមេបញ្ជាការយោធា ក្នុងអំឡុងពេលចាប់ផ្តើមប្រតិបត្តិការ ដើម្បីរារាំងក្រុងតេអេរ៉ង់កុំឲ្យផលិតបានអាវុធនុយក្លេអ៊ែរ៕