អ៊ីរ៉ង់ បានចោទប្រកាន់សហរដ្ឋអាមេរិកថាបានសមគំនិតក្នុងការវាយប្រហាររបស់អ៊ីស្រាអែល ទៅលើសាធារណរដ្ឋអ៊ីស្លាមមួយនេះ ដែលទីក្រុងវ៉ាស៊ីនតោនបានបដិសេធ ដោយប្រាប់ទីក្រុងតេអេរ៉ង់នៅឯកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិថា វានឹង «ប្រសើរ» ដើម្បីចរចាជុំវិញកម្មវិធីនុយក្លេអ៊ែររបស់ខ្លួន។ អ៊ីរ៉ង់ បានបើកការវាយប្រហារសងសឹកវិញទៅលើអ៊ីស្រាអែលកាលពីល្ងាចថ្ងៃសុក្រ ទី១៣ មិថុនា បន្ទាប់ពីអ៊ីស្រាអែល បានវាយប្រហារលើអ៊ីរ៉ង់ ជាមុន។ ឯកអគ្គរដ្ឋទូតអង្គការសហប្រជាជាតិរបស់អ៊ីស្រាអែល លោក Danny Danon បាននិយាយថា អ៊ីរ៉ង់បាននិងកំពុង «ត្រៀមសម្រាប់សង្គ្រាម» ហើយការវាយប្រហាររបស់អ៊ីស្រាអែលគឺ ជា «សកម្មភាពការពារជាតិ»។

ជាមួយគ្នានេះ សមភាគីអ៊ីរ៉ង់ លោក Amir Saeid Iravani បានចោទប្រកាន់អ៊ីស្រាអែលថា កំពុងព្យាយាម «សម្លាប់ផ្នែកការទូត បំផ្លាញការចរចា និងអូសទាញតំបន់នេះឱ្យធ្លាក់ចូលក្នុងជម្លោះកាន់តែធំ» ហើយលោក៏បាននិយាយថា ការសមគំនិតរបស់ទីក្រុងវ៉ាស៊ីនតោន គឺ «ហួសពីការសង្ស័យ» ។

លោក Iravani បាននិយាយទៅកាន់ក្រុមប្រឹក្សាសន្តិសុខថា «អ្នកទាំឡាយដែលគាំទ្ររបបនេះ ដោយសហរដ្ឋអាមេរិកនៅមុខគេ ត្រូវតែយល់ថាកំពុងសមគំនិត»។ 

ប្រធានាធិបតីអាមេរិក លោក Donald Trump បាននិយាយកាលពីថ្ងៃសុក្រថា លោកបានផ្តល់ឱសានវាទរយៈពេល៦០ថ្ងៃដល់ទីក្រុងតេអេរ៉ង់ ដែលត្រូវផុតកំណត់នៅថ្ងៃព្រហស្បតិ៍ ដើម្បីធ្វើកិច្ចព្រមព្រៀងលើកម្មវិធីចម្រាញ់សារធាតុអ៊ុយរ៉ានីញ៉ូម ដែលកំពុងតែកើនឡើងរបស់ខ្លួន។

កិច្ចពិភាក្សាជុំទី៦រវាងសហរដ្ឋអាមេរិក និងអ៊ីរ៉ង់ គ្រោងនឹងធ្វើឡើងក្នុងប្រទេសអូម៉ង់ នៅថ្ងៃអាទិត្យ ប៉ុន្តែវាមិនច្បាស់នោះថាតើ វានឹងដំណើរការទៅមុខឬយ៉ាងណានោះ។ លោក Danon បាននិយាយថា អ៊ីស្រាអែលបានអត់ធ្មត់ ទោះបីជាហានិភ័យកើនឡើងក៏ដោយ។