ប្រព័ន្ធផ្សព្វផ្សាយរដ្ឋបានរាយការណ៍ថា អាជ្ញាធរចិននៅលើកោះហៃណានភាគខាងត្បូង បានជម្លៀសមនុស្សរាប់ពាន់នាក់ បិទសាលារៀន និងផ្អាកសេវាផ្លូវរថភ្លើង ខណៈព្យុះទីហ្វុង Wutip បោកបក់ជិតដល់ដីគោក។

យោងតាមទីភ្នាក់ងារសារព័ត៌មានរដ្ឋ Xinhua បានឱ្យដឹងថា មនុស្សជាង១៦.០០០នាក់ ត្រូវបានជម្លៀសចេញពីការដ្ឋានសំណង់ តំបន់ទំនាប និងតំបន់ដែលងាយរងគ្រោះដោយទឹកជំនន់ដ៏គំហុក។ មនុស្ស ៤០.០០០បន្ថែមទៀតដែលកំពុងធ្វើការលើទូក ក៏ត្រូវបានឲ្យចាកចេញទៅកាន់មាត់ឆ្នេរផងដែរ។

វីដេអូពីទូរទស្សន៍រដ្ឋ CCTV បានបង្ហាញពីដើមឈើដែលត្រូវខ្យល់បក់បោកយ៉ាងខ្លាំង ហើយកម្មករកំពុងសម្អាតយកដើមឈើចេញដែលបានបាក់រលំលើដងផ្លូវក្នុងពេលមានភ្លៀងធ្លាក់។ រូបភាពផ្សេងទៀតបានបង្ហាញពីបុគ្គលិកសាជីវកម្មប្រេងជាតិចិននៅឈូងសមុទ្រ បានចាកចេញពីនាវាដោយមានកាបូបស្ពាយហើយរង់ចាំនៅកំពង់ផែដើម្បីឡើងជិះរថយន្តក្រុង។

សារព័ត៌មានស៊ីនហួ បាននិយាយថា ព្យុះទីហ្វុង Wutip ត្រូវបានព្យាករណ៍ថានឹងនាំមកនូវភ្លៀងធ្លាក់ខ្លាំងលើសពី១០០មីលីម៉ែត្រនៅទូទាំងទីក្រុង និងតំបន់ចំនួន៦ រួមជាមួយនឹងខ្យល់បក់ឈានដល់១០១ គីឡូម៉ែត្រក្នុងមួយម៉ោង។ ខេត្តហៃណាន បានផ្អាកសេវារថភ្លើងល្បឿនលឿន ខណៈទីក្រុង Sanya ភាគខាងត្បូងបានបិទសាលារៀន កន្លែងទេសចរណ៍ និងផ្អាកជើងហោះហើរទាំងអស់នៅអាកាសយានដ្ឋានរបស់ខ្លួន។ រដ្ឋបាលឧតុនិយមចិន (CMA) បាននិយាយថា ព្យុះទីហ្វុង Wutip ជាព្យុះដំបូងដែលបានបោកបក់ដល់ដីគោកប្រទេសចិននៅឆ្នាំនេះ ដែលបានកើតឡើងនៅលើសមុទ្រចិនខាងត្បូង កាលពីថ្ងៃពុធ។ ព្យុះនេះអាចបោកបក់ដល់ដីគោកម្តងទៀត នៅចន្លោះភាគខាងលិចខេត្តក្វាងទុង និងក្វាងស៊ី នៅថ្ងៃសៅរ៍នេះ ដោយរក្សានូវ «ឥទ្ធិពលព្យុះត្រូពិចខ្លាំងក្លា» មុនពេលបែរទៅភាគឦសាន និងចុះខ្សោយទៅវិញ។