យោធាអ៊ីស្រាអែលនៅថ្ងៃសៅរ៍ (ទី១៤ ខែមិថុនា)នេះ បានចេញផ្សាយរូបភាពវីដេអូឃ្លាំមើលដែលត្រូវបាននិយាយថា ដើម្បីបង្ហាញពីការវាយប្រហារលើគោលដៅនានា ក្នុងប្រទេសអ៊ីរ៉ង់ មួយថ្ងៃបន្ទាប់ពីបានបើកការវាយលុកតាមអាកាសដ៏ធំបំផុតមិនធ្លាប់មានប្រឆាំងនឹងសត្រូវយូរអង្វែងរបស់ខ្លួន ក្នុងគោលបំណងទប់ស្កាត់ប្រទេសនេះ ពីការអភិវឌ្ឍអាវុធនុយក្លេអ៊ែរ។

ដោយបានបង្ហោះនៅលើបណ្តាញសង្គម Telegram ចំណងជើងអមមួយ បាននិយាយថា កងកម្លាំងអាកាសអ៊ីស្រាអែល កំពុងបន្ត «វាយប្រហារគោលដៅជាច្រើនទៀត ដើម្បីបញ្ចប់ការគំរាមកំហែង នៅក្នុងប្រទេសអ៊ីរ៉ង់» ។

សារព័ត៌មានរ៉យទ័រ មិនអាចផ្ទៀងផ្ទាត់កាលបរិច្ឆេទ ឬទីតាំងនៃវីដេអូនោះ ដោយឯករាជ្យបានទេ។

អ៊ីស្រាអែលបានចាប់ផ្តើមការវាយលុកតាមអាកាសដ៏ធំបំផុតមិនធ្លាប់មានរបស់ខ្លួនប្រឆាំងនឹងអ៊ីរ៉ង់ កាលពីព្រឹកថ្ងៃសុក្រ (ទី ១៣ ខែមិថុនា) ប្រឆាំងនឹងមេបញ្ជាការ អ្នកវិទ្យាសាស្ត្រនុយក្លេអ៊ែរ គោលដៅយោធា និងទីតាំងនុយក្លេអ៊ែរ។ ទីក្រុងតេអេរ៉ង់ ដែលបដិសេធថា សកម្មភាពចម្រាញ់សារធាតុអ៊ុយរ៉ានីញ៉ូមរបស់ខ្លួន គឺជាផ្នែកមួយនៃកម្មវិធីអាវុធសម្ងាត់នោះ បានឆ្លើយតបដោយការបាញ់មីស៊ីលបាលីស្ទីករាប់រយគ្រាប់ទៅកាន់ប្រទេសអ៊ីស្រាអែល។