អ្នកនាំពាក្យរបស់អគ្គលេខាធិការអង្គការសហប្រជាជាតិ បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃព្រហស្បតិ៍ថា ប្រមុខអង្គការសហប្រជាជាតិ លោក អង់តូនីញ៉ូ ហ្គុតឺរេស (Antonio Guterres) បានជំរុញឲ្យអ៊ីស្រាអែល និងអ៊ីរ៉ង់ «បង្ហាញការអត់ធ្មត់ជាអតិបរមា» បន្ទាប់ពីរលកនៃការវាយប្រហារតាមផ្លូវអាកាសរបស់អ៊ីស្រាអែល។

ខណៈពេលដែលថ្កោលទោសយ៉ាងទូលំទូលាយ«ចំពោះការកើនឡើងភាពតានតឹងផ្នែកយោធាណាមួយ នៅមជ្ឈិមបូព៌ា» សេចក្តីថ្លែងការណ៍របស់អ្នកនាំពាក្យរងលោក Farhan Haq បានបញ្ជាក់ថា លោក ហ្គុយតឺរេស មាន«ការព្រួយបារម្ភយ៉ាងខ្លាំង » ដោយការវាយប្រហាររបស់អ៊ីស្រាអែលទៅលើទីតាំងនុយក្លេអ៊ែរ ចំពេលការចរចារវាងសហរដ្ឋអាមេរិក និងអ៊ីរ៉ង់ ដែលកំពុងបន្ត។

សេចក្តីថ្លែងការណ៍ បានបន្ថែមថា៖«លោកអគ្គលេខាធិការ បានស្នើឱ្យភាគីទាំងពីរ បង្ហាញការអត់ធ្មត់ជាអតិបរមា ដោយជៀសវាងរាល់កិច្ចប្រឹងប្រែងទាំង ដែលធ្លាក់ចូលទៅក្នុងជម្លោះកាន់តែជ្រៅឡើង ជាស្ថានភាពដែលតំបន់នេះ មិនអាចមានលទ្ធភាពដោះស្រាយបាន។