កាលពីថ្ងៃសៅរ៍ម្សិលមិញ នៅតាមទីក្រុងធំៗចាប់ពីទីក្រុង Los Angeles ដល់ទីក្រុង West Palm Beach រដ្ឋ Florida ប្រជាពលរដ្ឋអាមេរិករាប់ម៉ឺនរាប់សែននាក់ នាំគ្នាចូលរួមការដង្ហែរក្បួន ដើម្បីបរិហារវិធីសាស្រ្តដ៏គឃ្លើនរបស់លោកប្រធានាធិបតី Donald Trump ។

ក្រុមប្រឆាំងលោក Trumpមានគម្រោងធ្វើបាតុកម្មជិត ២ពាន់កន្លែងតាមចំនួនតូច-ធំ ដែលនឹងធ្វើឡើងក្រោមប្រធានបទ “គ្មានស្តេច”ដែលចង់សំដៅថា គ្មានបុគ្គលណាម្នាក់អាចអង្គុយលើច្បាប់បានឡើយ ។

បាតុកម្មដែលគាប់ជួននឹងខួបកំណើតលើកទី ៧៩របស់លោក Trump បានក្លាយជាកំសួលដ៏ខ្លាំងបំផុតមួយ ប្រឆាំងនឹងតំណែងប្រធានាធិបតីរបស់លោក Trump ចាប់តាំងពីរូបលោកបានវិលត្រឡប់មកកាន់អំណាចវិញកាលពីខែមករា ។

លោក Amy Shaw គឺជាបាតុករមួយរូបនៅទីក្រុង West Palm Beach និយាយថា លោកមិនចូលចិត្តវិធីដែលោក Trumpបំផ្លាញច្បាប់នៅក្នុងប្រទេសមួយនេះឡើយ ហើយគាត់កំពុងបំផ្លាញគោលការណ៍ប្រជាធិបតេយ្យរបស់ពួកយើងនៅក្នុងប្រទេសមួយនេះ វីធីដែលគាត់ប្រើប្រាស់យោធាប្រឆាំងជនស៊ីវិល និងវិធីដែលគាត់បញ្ចេញកងកម្លាំងឆ្មាំជាតិ ។

គួរឲ្យដឹងថា លោក Trumpបញ្ជាឲ្យទាហានឆ្មាំជាតិ និងកងកម្លាំងម៉ារីនសហរដ្ឋអាមេរិកដាក់ពង្រាយទៅកាន់ទីក្រុង Los Angeles ដើម្បីឆ្លើយតបនឹងបាតុកម្មតាមផ្លូវ ជុំវិញការវាយឆ្មក់អន្តោប្រវេសន៍ ។

បាតុកម្មទូទាំងប្រទេសកាលពីថ្ងៃសៅរ៍នេះដែរ បានកើតមាន ស្របពេលដែលមន្រ្តីយោធារាប់ពាន់នាក់ រថពាសដែក និងយន្តហោះ ត្រូវបានបញ្ជូនទៅកាន់ទីក្រុងវ៉ាស៊ីនតោន ជាការត្រៀមប្រារព្ធខួបលើកទី ២៥០នៃកងទ័ពសហរដ្ឋអាមេរិក ៕