រដ្ឋមន្ត្រីអាកាសចរណ៍ឥណ្ឌា បាននិយាយកាលថ្ងៃសៅរ៍ (១៤ មិថុនា) ថា និយតករអាកាសចរណ៍របស់ឥណ្ឌា បានបញ្ជាឱ្យយន្តហោះប្រភេទប៊ូអ៊ីង ៧៨៧ ទាំងអស់ ដែលកំពុងដំណើរការដោយក្រុមហ៊ុនអាកាសចរណ៍ក្នុងស្រុក ត្រូវត្រួតពិនិត្យភ្លាមៗ បន្ទាប់ពីសោកនាដកម្មធ្លាក់យន្តហោះពីក្រុមអាកាសចរណ៍ Air India បានសម្លាប់មនុស្សជិត ២៨០នាក់ ក្នុងសប្តាហ៍នេះ ខណៈអាជ្ញាធរកំពុងស៊ើបអង្កេតរកមូលហេតុ ដែលអាចកើតមានទាំងអស់។

និយតករអាកាសចរណ៍កាលពីថ្ងៃសុក្រ បានបញ្ជាឱ្យក្រុមហ៊ុន Air India ធ្វើការត្រួតពិនិត្យថែទាំបន្ថែមលើយន្តហោះប្រភេទ Boeing 787-8/9 របស់ខ្លួន ដែលបំពាក់ដោយម៉ាស៊ីន GEnx រួមទាំងការវាយតម្លៃលើប៉ារ៉ាម៉ែត្រនៃការហោះហើរជាក់លាក់ ធ្វើតេស្តត្រួតពិនិត្យម៉ាស៊ីនអេឡិចត្រូនិក និងពិនិត្យទាក់ទងនឹងប្រេងម៉ាស៊ីន។

រដ្ឋមន្ត្រីអាកាសចរណ៍ លោក Ram Mohan Naidu ប្រាប់អ្នកយកព័ត៌មាននៅក្រុងញូវដែលីថា "អាជ្ញាធរក៏បញ្ជាឱ្យតាមដានបន្ថែមនៃយន្តហោះប្រភេទ ៧៨៧ ទាំងអស់ផងដែរ ដោយមាន ៣៤គ្រឿងនៅក្នុងកងនាវាឥណ្ឌា"។ លោកមិនបានបញ្ជាក់ទេថា តើមន្ត្រីរដ្ឋាភិបាលនឹងចូលរួមក្នុងការត្រួតពិនិត្យនេះឬយ៉ាងណា។

យន្តហោះ Boeing 787-8 Dreamliner ដឹកមនុស្ស ២៤២នាក់នៅលើនោះ ដែលធ្វើដំណើរទៅកាន់អាកាសយានដ្ឋាន Gatwick របស់ចក្រភពអង់គ្លេស បានចាប់ផ្តើមបាត់បង់រយៈកម្ពស់ ប៉ុន្មានវិនាទីប៉ុណ្ណោះបន្ទាប់ពីការហោះហើរនៅថ្ងៃព្រហស្បតិ៍ ហើយបានធ្លាក់បុកអគារនៅខាងក្រោមរួចក៏ផ្ទុះឆេះ ដែលជាគ្រោះមហន្តរាយអាកាសចរណ៍ដ៏អាក្រក់បំផុតរបស់ពិភពលោក ក្នុងពេលមួយទសវត្សរ៍។ លោក Naidu បញ្ជាក់ថា រដ្ឋាភិបាលនឹងពិនិត្យមើលទ្រឹស្តីនានាដែលអាចកើតមានទាំងអស់ អំពីមូលហេតុពិតដែលនាំឱ្យមានការធ្លាក់យន្តហោះនេះ៕