អង្គការសហគមន៍មួយបាននិយាយថា ក្រុមគ្រួសារមីយ៉ាន់ម៉ា រាប់រយនាក់ កំពុងត្រូវបានបណ្ដេញចេញពីផ្ទះសម្បែងរបស់ពួកគេកាលពីថ្ងៃសៅរ៍ (១៤ មិថុនា) ជាមួយបង្វិចសម្លៀកបំពាក់ រួមទាំងរបស់របរផ្សេងទៀត តាមក្បួនជម្លៀសមួយគេចចេញពីការប្រយុទ្ធគ្នារវាងរបបសឹក និងទ័ពព្រៃប្រឆាំងរដ្ឋប្រហារ។

មីយ៉ាន់ម៉ា ត្រូវបានបំផ្លាញដោយសង្រ្គាមស៊ីវិលពហុភាគី ចាប់តាំងពីយោធាដណ្តើមអំណាចនៅក្នុងរដ្ឋប្រហារឆ្នាំ២០២១មក ដែលបណ្តាលឱ្យមនុស្សជាង ៣,៥លាននាក់ ត្រូវភៀសខ្លួន នេះបើយោងតាមតួលេខរបស់អង្គការសហប្រជាជាតិ។

យោងតាមអ្នកស្រុក និងក្រុមរៀបចំការជម្លៀស បានឱ្យដឹងថា ការប្រយុទ្ធគ្នាខ្លាំងក្លា បាននិងកំពុងផ្ទុះឡើងតាំងពីថ្ងៃចន្ទដើមសប្ដាហ៍នេះមក នៅជុំវិញភូមិ Saung Nang Khae ក្នុងរដ្ឋសាន ភាគខាងកើត។ នៅថ្ងៃសៅរ៍ លោក Khun Pyae Linn អ្នកនាំពាក្យក្រុមយុវជននៃគណបក្ស Kayan New Land ដែលគ្រប់គ្រងតំបន់ និងដែលរៀបចំកិច្ចប្រឹងប្រែងជម្លៀសនោះ បាននិយាយថា នៅថ្ងៃសៅរ៍ "មនុស្សជាង ៦០០នាក់ត្រូវបានជម្លៀស ប៉ុន្តែមានអង្គការផ្សេងទៀតក៏បានជួយអ្នកភូមិផងដែរ ដូច្នេះអាចនឹងមានអ្នកភូមិជាង ១.៥០០នាក់ ដែលត្រូវជម្លៀសទៅទីសុវត្ថិភាព"។

យោធា និងគូសត្រូវមួយចំនួនបានសន្យាលើបទឈប់បាញ់មួយក្នុងខែមិថុនា ខណៈប្រទេសនេះកំពុងងើបឡើងវិញពីការរញ្ជួយដីកម្រិត ៧,៧ រ៉ិចទ័រកាលពីខែមីនា ដែលសម្លាប់មនុស្សជាង ៣.៧០០នាក់ ប៉ុន្តែការប្រយុទ្ធគ្នាហាក់នៅតែបន្តយ៉ាងក្ដៅគគុក៕