យោធាអ៊ីស្រាអែល នៅថ្ងៃអាទិត្យ (១៥ មិថុនា) នេះ បានចេញការព្រមានជម្លៀសដល់ប្រជាជនអ៊ីរ៉ង់ ដែលរស់នៅក្បែរមូលដ្ឋានផលិតអាវុធក្នុងទីក្រុងតេអេរ៉ង់ ខណៈប្រទេសទាំងពីរបានបន្តវាយប្រហារដាក់គ្នាទៅមកដោយមីស៊ីល ដែលបានចាប់ផ្តើមតាំងតែពីថ្ងៃសុក្រសប្ដាហ៍នេះមក។

រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយនៅក្នុងសេចក្តីថ្លែងការណ៍មួយថា "យោធាអ៊ីស្រាអែល នឹងវាយលុកទីតាំងទាំងនេះ ហើយនឹងបន្តពន្លាត់ស្បែកពស់របស់អ៊ីរ៉ង់ នៅក្នុងទីក្រុងតេអេរ៉ង់ និងគ្រប់ទីកន្លែង ដោយផ្តោតលើសមត្ថភាពនុយក្លេអ៊ែរ និងប្រព័ន្ធសព្វាវុធ"។

អ្នកនាំពាក្យយោធាអ៊ីស្រាអែល បាននិយាយនៅលើបណ្ដាញសង្គម X ជាភាសាអារ៉ាប់ និងហ្វាស៊ីថា៖ នៅមុននេះ អ៊ីស្រាអែល បានចេញការព្រមានជម្លៀសប្រជាជនអ៊ីរ៉ង់ ដែលរស់នៅក្បែរកន្លែងអាវុធក្នុងប្រទេសអ៊ីរ៉ង់។ អ្នកនាំពាក្យរូបនេះបន្តថា ការព្រមានទាំងនោះរួមមាននៅតាមរោងចក្រផលិតអាវុធ និងមូលដ្ឋានជំនួយទាំងអស់។

អ៊ីស្រាអែល បានបើកការវាយប្រហារយោធាដ៏ធំបំផុតរបស់ខ្លួនប្រឆាំងនឹងអ៊ីរ៉ង់ កាលពីថ្ងៃសុក្រ ដោយនិយាយថា គោលដៅរបស់ខ្លួនគឺដើម្បីបញ្ឈប់អ៊ីរ៉ង់ មិនឱ្យអភិវឌ្ឍអាវុធនុយក្លេអ៊ែរ និងដើម្បីលុបបំបាត់សមត្ថភាពមីស៊ីលបាលីស្ទិករបស់អ៊ីរ៉ង់ ខណៈទីក្រុងតេអេរ៉ង់ ក៏បានវាយប្រហារសងសឹកជាបន្តបន្ទាប់៕