ប្រធានាធិបតីសហរដ្ឋអាមេរិក លោក Donald Trump បាននិយាយនៅក្នុងការបង្ហោះលើបណ្តាញផ្សព្វផ្សាយសង្គមកាលពីថ្ងៃអាទិត្យ ទី១៥ មិថុនា ថា អ៊ីរ៉ង់ និងអ៊ីស្រាអែល នឹងមានសន្តិភាព «ក្នុងពេលឆាប់ៗនេះ» ដោយលោកនិយាយបន្ថែមថា មានកិច្ចប្រជុំមិនជាក់លាក់ជាច្រើនបានធ្វើឡើង ហើយប្រទេសទាំងពីរនឹងបង្កើតបានកិច្ចព្រមព្រៀងមួយ។

លោ Trump ពុំបានផ្តល់ព័ត៌មានលម្អិតណាមួយអំពីកិច្ចប្រជុំ ឬភស្តុតាងនៃវឌ្ឍនភាពឆ្ពោះទៅរកសន្តិភាពនោះទេ។ ការអះអាងរបស់លោក ផ្ទុយទៅនឹងការអត្ថាធិប្បាយរបស់នាយករដ្ឋមន្ត្រី លោក Benjamin Netanyahu ដែលបាននិយាយថា យុទ្ធនាការរបស់អ៊ីស្រាអែលប្រឆាំងនឹងអ៊ីរ៉ង់ នឹងកាន់តែខ្លាំងឡើង។

លោក Trump ក៏បានប្រាប់បណ្តាញព័ត៌មានកាលពីថ្ងៃអាទិត្យថា វានៅតែអាចទៅរួចដែលសហរដ្ឋអាមេរិក នឹងចូលពាក់ព័ន្ធក្នុងជម្លោះរវាងអ៊ីរ៉ង់និងអ៊ីស្រាអែល ហើយលោកនឹង «បើកចំហ» ចំពោះសមភាគីរុស្ស៊ីលោក Vladimir Putin ជាអ្នកសម្រុះសម្រួល។

លោក Trump បាននិយាយនៅក្នុងបទសម្ភាសន៍មួយថា «វាអាចធ្វើទៅបាន ដែលយើងអាចចូលពាក់ព័ន្ធ» នៅក្នុងការប្រយុទ្ធដែលកំពុងបន្តរវាងសត្រូវនៅតំបន់មជ្ឈិមបូព៌ាទាំងពីរ ហើយយោងតាមប្រព័ន្ធផ្សព្វផ្សាយ ABC News បាននិយាយថា ប្រធានាធិបតីគណបក្សសាធារណរដ្ឋរូបនេះ បានសង្កត់ធ្ងន់ថា សហរដ្ឋអាមេរិក នៅពេលនេះមិនពាក់ព័ន្ធទៅនឹងសកម្មភាពយោធាទេ។ ចំពោះលោក Putin ជាអ្នកសម្របសម្រួលដ៏មានសក្តានុពលក្នុងជម្លោះ «លោកបានត្រៀមខ្លួនជាស្រេច»។ អ្នកនាំពាក្យសេតវិមាន ពុំបានឆ្លើយតបភ្លាមៗចំពោះសំណើសុំការអត្ថាធិប្បាយអំពីរបៀបដែល លោក Trump និងសេតវិមាន កំពុងធ្វើការដើម្បីកាត់បន្ថយស្ថានការណ៍នៅមជ្ឈិមបូព៌ានោះទេ។ លោក Trump ដែលចាត់ទុកខ្លួនឯងថាជាអ្នកបង្កើតសន្តិភាព និងបានធ្វើឲ្យមានការរិះគន់ពីមូលដ្ឋាននយោបាយរបស់លោក ចំពោះការមិនអាចទប់ស្កាត់ជម្លោះអ៊ីស្រាអែលនិងអ៊ីរ៉ង់ ដោយបានលើកឡើងពីជម្លោះផ្សេងទៀតដែលលោកទទួលខុសត្រូវក្នុងការដោះស្រាយ រួមមានរវាងប្រទេសឥណ្ឌា និងប៉ាគីស្ថាន ជាដើម។