ខ្មាន់កាំភ្លើង ដែលបានបាញ់សម្លាប់សមាជិកសភាមកពីបក្សប្រជាធិបតេយ្យមួយរូបរបស់រដ្ឋ Minnesota ដោយក្លែងខ្លួនធ្វើជាមន្ត្រីនគរបាល នៅតែមិនទាន់ត្រូវចាប់ខ្លួនបាននៅឡើយ កាលពីថ្ងៃអាទិត្យ (១៥ មិថុនា) ខណៈនគរបាលបានបន្តប្រតិបត្តិការតាមប្រមាញ់ចាប់ខ្លួនដ៏ធំ បន្ទាប់ពីជនសង្ស័យរូបនោះបានប្រព្រឹត្តឧក្រិដ្ឋកម្ម ដែលលោកអភិបាលរដ្ឋ Tim Walz ចាត់ទុកថាជា "ការធ្វើឃាតដោយហេតុផលនយោបាយ"។

អាជ្ញាធរនិយាយថា ពួកគេបានរកឃើញរថយន្តមួយគ្រឿង មួក និងរបស់របរផ្សេងទៀត ដែលជាកម្មសិទ្ធិរបស់ជនសង្ស័យឈ្មោះ Vance Luther Boelter វ័យ ៥៧ឆ្នាំ នៅតំបន់ជនបទភាគនិរតីនៃទីក្រុង Minneapolis ប៉ុន្តែមិនទាន់រកឃើញជនដៃដល់រូបនោះនៅឡើយ។ លោក Drew Evans ប្រធានការិយាល័យស៊ើបអង្កេតឧក្រិដ្ឋកម្មរដ្ឋ Minnesota បានប្រាប់សន្និសីទសារព័ត៌មានថា "អាជ្ញាធរកំពុងប្រតិបត្តិការ ហើយជឿថា ពេលនេះជនល្មើសរូបនោះនៅមានជីវិត"។

ខ្មាន់កាំភ្លើង Boelter បានរត់គេចខ្លួនដោយថ្មើរជើងកាលពីព្រឹកថ្ងៃសៅរ៍ នៅពេលក្រុមមន្រ្តីបានប្រឈមមុខនឹងរូបគេនៅឯលំនៅឋាន Brooklyn Park របស់តំណាងរាស្រ្តរដ្ឋ គឺលោកស្រី Melissa Hortman ដែលជាសមាជិកបក្សប្រជាធិបតេយ្យជាន់ខ្ពស់មួយរូបនៅសភា Minnesota និងស្វាមីរបស់លោកស្រីឈ្មោះ Mark ដែលត្រូវបានបាញ់សម្លាប់ទាំងពីរនាក់។

យោងតាមការបង្ហោះតាមអ៊ីនធឺណិត និងកំណត់ត្រាសាធារណៈដែលពិនិត្យដោយសារព័ត៌មានរ៉យទ័របង្ហាញថា ជនសង្ស័យ Boelter មានទំនាក់ទំនងជាមួយបណ្ដាញផ្សាយដំណឹងគ្រិស្តសាសនា ហើយបានអះអាងថាខ្លួនជាអ្នកជំនាញសន្តិសុខដែលមានបទពិសោធន៍នៅតំបន់ហ្កាហ្សាស្ទ្រីប និងអាហ្រ្វិក៕