កម្មវិធីពិព័រណ៍អាកាសរបស់ទីក្រុងប៉ារីស Paris Airshow បានចាប់ផ្ដើមប្រព្រឹត្តទៅក្នុងប្រទេសបារាំង នៅថ្ងៃចន្ទ (១៦ មិថុនា) នេះ ខណៈការបញ្ជាទិញយន្តហោះតាមធម្មតា ត្រូវរំពឹងថានឹងធ្លាក់ចុះ ដោយសារក្ដីបារម្ភពីគ្រោះមហន្តរាយផ្លូវអាកាសដ៏អាក្រក់បំផុតនៅឥណ្ឌា និងកំណើនការវាយប្រហារដាក់គ្នាដោយមីស៊ីលរវាងអ៊ីស្រាអែល និងអ៊ីរ៉ង់ ដែលធ្វើឱ្យឧស្សាហកម្មអាកាសចរណ៍ពិភពលោកមានភាពររង្គោះរង្គើ។

រៀងរាល់ពីរឆ្នាំម្តង អាកាសយានដ្ឋាន Le Bourget នៅភាគឦសានទីក្រុងប៉ារីស បានប្រែក្លាយទៅជាទីតាំងបង្ហាញសម្រាប់វិស័យអាកាសចរណ៍ និងវិស័យការពារជាតិ ដោយផ្លូវហោះហើរដ៏ធំទូលាយរបស់អាកាសយានដ្ឋាននេះត្រៀបត្រាដោយយន្តហោះចម្បាំង យន្តហោះពាណិជ្ជកម្ម និងយានដ្រូនស្វ័យប្រវត្តិ។

នៅក្នុងបន្ទប់ពណ៌សតាមខ្សែបន្ទាត់ហោះហើរ នាយកប្រតិបត្តិផ្នែកអាកាសចរណ៍ មន្ត្រីរដ្ឋាភិបាល និងគណៈប្រតិភូយោធានានា បានប្រមូលផ្តុំគ្នាដើម្បីធ្វើកិច្ចព្រមព្រៀង និងពិភាក្សាពីកងកម្លាំងភូមិសាស្ត្រនយោបាយ។ គណៈប្រតិភូនិយាយថា ពួកគេរំពឹងថាព្រឹត្តិការណ៍នៅឆ្នាំនេះដែលចាប់ពីថ្ងៃទី១៦-២០ ខែមិថុនា នឹងមានភាពស្ងប់ស្ងាត់ជាងមុន ហើយសកម្មភាពសាធារណៈជាច្រើននឹងត្រូវកាត់បន្ថយ បន្ទាប់ពីមហន្តរាយផ្លូវអាកាសកាលពីសប្តាហ៍មុន នៅពេលយន្តហោះ Boeing 787 របស់ក្រុមហ៊ុនអាកាសចរណ៍ Air India បានធ្លាក់ភ្លាមៗបន្ទាប់ពីហោះឡើង ដោយបានសម្លាប់មនុស្សជិត ៣០០នាក់។

លើសពីនេះ ឧស្សាហកម្មអាកាសក៏ត្រូវរង្គោះរង្គើផងដែរដោយការវាយប្រហារមីស៊ីលរវាងអ៊ីរ៉ង់ និងអ៊ីស្រាអែល ដែលបានផ្ទុះឡើងកាលពីថ្ងៃសុក្រសប្ដាហ៍មុន - មួយថ្ងៃប៉ុណ្ណោះបន្ទាប់ពីការធ្លាក់យន្តហោះនៅឥណ្ឌា - ដែលបង្ខំឱ្យក្រុមហ៊ុនអាកាសចរណ៍លុបចោល ឬបង្វែរជើងហោះហើររាប់ពាន់ជើងរបស់ខ្លួន នៅក្នុងភាពចលាចលចុងក្រោយបំផុតក្នុងការធ្វើដំណើរក្នុងតំបន់៕