ហ្វូងមនុស្សរាប់ពាន់នាក់ បានដើរដង្ហែតាមដងផ្លូវនៃទីក្រុងនានានៅភាគខាងត្បូងអឺរ៉ុប កាលពីថ្ងៃអាទិត្យ (១៥ មិថុនា) ដើម្បីធ្វើបាតុកម្មប្រឆាំងនឹងកំណើនភ្ញៀវទេសចរដ៏ច្រើនលើសលប់ខ្លាំងពេក ជាមួយនឹងភាពតានតឹងតាមដងផ្លូវក្នុងទីក្រុងបាសេឡូណា របស់អេស្ប៉ាញ ជាទីដែលការតវ៉ាដ៏ធំបានកើតឡើង។

ក្រុមបាតុករបានស្រែកនៅតាមដងផ្លូវទីក្រុងបាសេឡូណាថា "ថ្ងៃឈប់សម្រាករបស់អ្នក ជាទុក្ខវេទនារបស់ពួកយើង" ខណៈដែលកាន់បដាសរសេរឃ្លាតវ៉ាដូចជា "ទេសចរណ៍ទ្រង់ទ្រាយធំសម្លាប់ទីក្រុង" និង "ការលោភលន់របស់ពួកគេនាំឱ្យយើងវិនាស"។ គួរឱ្យដឹងថា បាសេឡូណា ជាទីក្រុងអេស្ប៉ាញមានប្រជាជន ១,៦លាននាក់ ហើយទាក់ទាញភ្ញៀវទេសចររហូតដល់ ២៦លាននាក់កាលពីឆ្នាំមុន។

នៅក្រោមឆ័ត្រនៃសម្ព័ន្ធភាព SET ឬហៅថា "អឺរ៉ុបខាងត្បូងប្រឆាំងនឹងទេសចរណ៍លើសលប់" - ក្រុមអ្នកតវ៉ាបានចូលរួមជាមួយក្រុមបាតុករនៅព័រទុយហ្គាល់ និងអ៊ីតាលី ដោយលើកហេតុផលថា វិស័យទេសចរណ៍ដែលមិនមានការគ្រប់គ្រង បានធ្វើឱ្យតម្លៃលំនៅឋានឡើងថ្លៃ និងបង្ខំប្រជាជនឱ្យចាកចេញពីតំបន់លំនៅឋានរបស់ពួកគេ។

នៅទីក្រុងបាសេឡូណា រដ្ឋាភិបាលក្រុងបាននិយាយកាលពីឆ្នាំមុនថា ខ្លួននឹងរារាំងការជួលផ្ទះល្វែងដល់ភ្ញៀវទេសចរនៅឆ្នាំ២០២៨ ដើម្បីធ្វើឱ្យក្រុងនេះកាន់តែមានភាពរស់រវើកសម្រាប់អ្នករស់នៅ។ ការចំណាយលើការធ្វើដំណើរអន្តរជាតិនៅអឺរ៉ុប ត្រូវបានរំពឹងថានឹងកើនឡើង ១១% ដល់ ៨៣៨ពាន់លានដុល្លារនៅឆ្នាំនេះ ដោយអេស្ប៉ាញ និងបារាំង ស្ថិតក្នុងចំណោមប្រទេសដែលត្រៀមនឹងទទួលចំនួនភ្ញៀវទេសចរច្រើនជាងគេ៕