ប្រធានាធិបតីអាមេរិក លោក Donald Trump កាលពីថ្ងៃអាទិត្យ (១៥ មិថុនា) បាននិយាយថា កិច្ចខិតខំប្រឹងប្រែងដើម្បីនិរទេសមនុស្សរស់នៅខុសច្បាប់ក្នុងសហរដ្ឋអាមេរិក ត្រូវតែពង្រីក រួមទាំងពីទីក្រុងនានាដូចជា Los Angeles, Chicago និង New York ដែលបានមើលឃើញការតវ៉ាដ៏រីករាលដាល ចាប់តាំងពីការបង្កើនឆ្មក់បង្រ្កាបអន្តោប្រវេសន៍។

លោក Trump បាននិយាយក្នុងការបង្ហោះនៅលើបណ្ដាញសង្គម Truth Social របស់លោកថា "រូបលោកបានបញ្ជាឱ្យរដ្ឋបាលទាំងមូល ដាក់ធនធានទាំងអស់ដែលអាចធ្វើទៅបាន នៅពីក្រោយកិច្ចខិតខំប្រឹងប្រែងនេះ"។ លោក Trump មិនបានបញ្ជាក់លម្អិតទេថា តើលោកមានបំណងចង់បង្កើនកិច្ចខិតខំប្រឹងប្រែងនោះតាមមធ្យោបាយណា។

ការព្រមាននេះកើតឡើងបន្ទាប់ពីភាពតានតឹងពេញមួយសប្តាហ៍នៅក្នុងទីក្រុង Los Angeles ជាទីដែលលោក Trump បានកោះហៅកងទ័ពឆ្មាំជាតិ និងកងម៉ារីនអាមេរិក ឱ្យជួយរក្សាសន្តិភាព ជុំវិញការជំទាស់របស់អភិបាលរដ្ឋមកពីបក្សប្រជាធិបតេយ្យ លោក Gavin Newsom។

លោក Trump កំពុងអនុវត្តយុទ្ធនាការដែលលោកសន្យាថានិរទេសជនអន្តោប្រវេសន៍ ដោយប្រើប្រាស់យុទ្ធសាស្ត្របង្ខិតបង្ខំ ឱ្យស្របនឹងរចនាប័ទ្មនយោបាយខុសស្តង់ដារ ដែលធ្វើលោកជាប់ឆ្នោតពីរដងមកហើយ។ ប្រធានាធិបតីរូបនេះបាននិយាយថា កងទ័ពគឺចាំបាច់ដើម្បីបំបាត់បាតុកម្ម ដោយនេះជាអ្វីដែលរដ្ឋ និងមន្ត្រីក្នុងតំបន់ប្រកែក។

លោក Tom Homan ដែលជាមន្ត្រីព្រំដែនរបស់លោក Trump បានប្រាប់រ៉យទ័រកាលពីចុងខែឧសភាថា រដ្ឋបាលថ្មីបាននិរទេសមនុស្សប្រហែល ២០០.០០០នាក់ ក្នុងរយៈពេល ៤ខែកន្លងទៅនោះ៕