សារព័ត៌មាន ABC News បានរាយការណ៍ដោយសម្អាងដល់ប្រភពជាច្រើនថា នគរបាលសហរដ្ឋអាមេរិក បានចាប់ខ្លួនបុរសម្នាក់កាលពីថ្ងៃអាទិត្យ (១៥ មិថុនា) ដែលត្រូវចោទប្រកាន់ថាបានបាញ់សម្លាប់សមាជិកសភាមកពីបក្សប្រជាធិបតេយ្យប្រចាំរដ្ឋ Minnesota លោកស្រី Melissa Hortman និងស្វាមីរបស់លោកស្រី ដោយក្លែងធ្វើជាមន្ត្រីនគរបាល នៅក្នុងឧក្រិដ្ឋកម្មមួយដែលលោកអភិបាលរដ្ឋ Tim Walz ចាត់ទុកថាជា "ការធ្វើឃាតដោយហេតុផលនយោបាយ"។

ABC News និយាយថា បុរសនោះត្រូវបានចាប់ខ្លួននៅជិតកសិដ្ឋានរបស់គេជិតតំបន់ Green Isle រដ្ឋ Minnesota ប៉ុន្តែនាយកដ្ឋានសុវត្ថិភាពសាធារណៈរដ្ឋ Minnesota មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើការចាប់ខ្លួននេះទេ។

ការិយាល័យតម្រួតនៅ Ramsey County នៃរដ្ឋ Minnesota បានបង្ហោះរូបថតមួយសន្លឹកលើប្រព័ន្ធផ្សព្វផ្សាយសង្គមកាលថ្ងៃអាទិត្យ ដែលហាក់ដូចជាបង្ហាញពីខ្មាន់កាំភ្លើងជាប់សង្ស័យ ឈ្មោះ Vance Luther Boelter វ័យ ៥៧ឆ្នាំ ដែលកំពុងជាប់ឃុំខ្លួន។

អាជ្ញាធរនិយាយថា ពួកគេបានរកឃើញរថយន្តមួយគ្រឿង មួក និងរបស់របរផ្សេងទៀត ដែលជាកម្មសិទ្ធិរបស់ជនសង្ស័យនោះនៅតំបន់ជនបទភាគនិរតីនៃទីក្រុង Minneapolis។ ខ្មាន់កាំភ្លើង Boelter បានរត់គេចខ្លួនដោយថ្មើរជើងនៅព្រឹកថ្ងៃសៅរ៍ នៅពេលក្រុមមន្រ្តីបានប្រឈមមុខនឹងរូបគេនៅឯលំនៅឋាន Brooklyn Park របស់តំណាងរាស្រ្តរដ្ឋ ដែលត្រូវបានបាញ់សម្លាប់រូបនោះ៕