អ្នកនាំពាក្យបញ្ជាការខាងត្បូងនៃកងទ័ពរំដោះប្រជាជនចិន លោក Tian Junli បាននិយាយកាលពីថ្ងៃអាទិត្យ (១៥ មិថុនា) ថា យោធាចិន បានធ្វើការល្បាតតាមសមុទ្រ និងផ្លូវអាកាសរួមគ្នានៅក្នុងសមុទ្រចិនខាងត្បូង កាលពីថ្ងៃសៅរ៍ចុងសប្ដាហ៍ ហើយបានព្រមានដល់កងកម្លាំងផ្សេងទៀតនៅទីនោះ។

លោក Tian បានលើកឡើងក្នុងសេចក្តីថ្លែងការណ៍ថា ហ្វីលីពីន បានពាក់ព័ន្ធជាមួយប្រទេសក្រៅតំបន់ដើម្បីរៀបចំ "ការល្បាតរួមគ្នា" និង "បង្កើនហានិភ័យសន្តិសុខ" នៅក្នុងតំបន់។

លោកបន្តថា៖ "កងកម្លាំងបញ្ជាការនៅតែមានការប្រុងប្រយ័ត្នខ្ពស់ ការពារយ៉ាងម៉ឺងម៉ាត់នូវអធិបតេយ្យភាពជាតិ និងសិទ្ធិដែនសមុទ្ររបស់ចិន" ដោយព្រមានថា "រាល់សកម្មភាពយោធាដែលចង់បង្កបញ្ហានៅសមុទ្រចិនខាងត្បូង ឬបង្កើតចំណុចប៉ះទង្គិច គឺស្ថិតនៅក្រោមការគ្រប់គ្រងទាំងស្រុង"។

គួរឱ្យដឹងថា ហ្វីលីពីន និងសហរដ្ឋអាមេរិក បានធ្វើសមយុទ្ធដែនសមុទ្ររួមគ្នានៅសមុទ្រចិនខាងត្បូងជាលើកទី៧ កាលពីដើមខែនេះ។ ភាពតានតឹងបានបន្តកើនឡើងខ្ពស់រវាងចិន និងហ្វីលីពីន ជុំវិញជម្លោះដែនដីនៅសមុទ្រចិនខាងត្បូង ដែលជាផ្លូវសម្រាប់ពាណិជ្ជកម្មនាវាឆ្លងកាត់ប្រចាំឆ្នាំជាង ៣សែនកោដិដុល្លារ៕