នគរបាលបានបាញ់ឧស្ម័នបង្ហៀរទឹកភ្នែកទៅលើបាតុករនៅទីក្រុង Los Angeles ដើម្បីបោសសម្អាតផ្លូវនៃក្រុមអ្នកតវ៉ា។

ក្រុមអ្នកតវ៉ា បានព្យាយាមបិទផ្លូវដោយប្រើប្រាស់របាំងការពារ ប៉ុន្តែសំឡេងផ្ទុះ និងឧស្ម័នបង្ហៀរទឹកភ្នែកត្រូវបានប្រើខណៈនគរបាល បានចូលទៅជិត ដែលក្រុមអ្នកតវ៉ាត្រូវបានបំបែក។

បាតុកររាប់ពាន់នាក់ បានមកប្រមូលផ្តុំគ្នានៅទីក្រុង Los Angeles ជាផ្នែកមួយនៃបាតុកម្មនៅទូទាំងប្រទេសដែលត្រូវបានសម្របសម្រួលដើម្បីតវ៉ាប្រឆាំងគោលនយោបាយរបស់រដ្ឋបាល លោក Trump នៅក្នុងបាតុកម្មទូទាំងប្រទេសដែលគេហៅថា «No Kings Day» ។

ការតវ៉ាជាច្រើន បានធ្វើឡើងបន្ទាប់ពីភាពតានតឹងមួយសប្តាហ៍នៅក្នុងទីក្រុង Los Angeles ជាកន្លែងដែលបាតុកម្មជាច្រើនត្រូវបានធ្វើឡើងជុំវិញការឆ្មក់បង្ក្រាបជនអន្តោប្រវេសន៍សហព័ន្ធ ដែលបានបណ្តាលឱ្យប្រធានាធិបតីអាមេរិក លោក Donald Trump អំពាវនាវឱ្យកងទ័ពឆ្មាំជាតិ និងទាហានម៉ារីនអាមេរិកជួយរក្សាសន្តិភាព។