បាតុករគាំទ្រប៉ាឡេស្ទីនរាប់ម៉ឺននាក់បានប្រមូលផ្តុំគ្នានៅក្នុងប្រទេសហូឡង់ ដើម្បីប្រឆាំងនឹងសង្រ្គាមប្រល័យពូជសាសន៍របស់អ៊ីស្រាអែលលើតំបន់ហ្កាហ្សា និងដើម្បីអំពាវនាវឱ្យរដ្ឋាភិបាលប្រកាន់ជំហររឹងមាំជាងនេះ ខណៈប្រជាជនប៉ាឡេស្ទីនជាង៥៥.៣០០នាក់ ត្រូវបានសម្លាប់ក្នុងសង្រ្គាមរយៈពេលជាង ២០ខែ។  

កាលពីថ្ងៃអាទិត្យ ហ្វូងមនុស្សយ៉ាងច្រើនបានដើរដង្ហែតាមដងផ្លូវនៃទីក្រុងឡាអេ ជាលើកទីពីរក្នុងរយៈពេលបួនសប្តាហ៍ឆ្ពោះទៅកាន់តុលាការយុត្តិធម៌អន្តរជាតិ។

ក្រុមសិទ្ធិមនុស្ស ដែលស្ថិតក្នុងចំណោមអ្នករៀបចំបាតុកម្ម រួមទាំងអង្គការលើកលែងទោសអន្តរជាតិ និងអុកស្វាម(Oxfam)បាននិយាយថា បាតុកម្មនេះមានគោលបំណងបង្កើត "បន្ទាត់ក្រហម" ជានិមិត្តរូប ដែលពួកគេនិយាយថា រដ្ឋាភិបាលបានបរាជ័យក្នុងការកំណត់ដើម្បីបញ្ឈប់សង្គ្រាមរបស់អ៊ីស្រាអែលលើតំបន់ហ្កាហ្សា និងប្រជាជនប៉ាឡេស្ទីនរបស់ខ្លួន។

ក្រុមបាតុករបានច្រៀង ថ្លែងសុន្ទរកថា និងដើរដង្ហែរឆ្លងកាត់តុលាការដែលកំពុងបើកសវនាការលើសំណុំរឿងមួយ ដោយប្រទេសអាហ្រ្វិកខាងត្បូង ចោទប្រកាន់អ៊ីស្រាអែលថាបានប្រព្រឹត្តអំពើប្រល័យពូជសាសន៍ក្នុងអំឡុងពេលសង្គ្រាមរបស់ខ្លួនលើតំបន់រងការឡោមព័ទ្ធមួយនេះ។

លោក Michiel Servaes នាយកអង្គការ Oxfam Novib បាននិយាយថា មនុស្សជា១៥០.០០០នាក់ បានចូលរួមការតវ៉ាដោយអំពាវនាវឱ្យដាក់ទណ្ឌកម្មដ៏ម៉ឺងម៉ាត់ដើម្បីបញ្ឈប់ការប្រល័យពូជសាសន៍នៅលើដែនដីហ្កាហ្សាដែលនៅតែបន្តគ្មានសញ្ញាបញ្ចប់ ៕