សេចក្ដីរាយការណ៍នៅថ្ងៃចន្ទ (១៦ មិថុនា) នេះ ពីសារព័ត៌មាន ANI របស់ឥណ្ឌា បានឱ្យដឹងថា ជើងហោះហើរមួយរបស់ក្រុមហ៊ុនអាកាសចរណ៍ Air India ដែលកំពុងធ្វើដំណើរពីទីក្រុងហុងកុង ទៅកាន់ទីក្រុងដេលី ត្រូវបានបង្ខំឱ្យបត់ត្រលប់ទៅវិញភ្លាមៗបន្ទាប់ពីហោះឡើង ដោយសារតែសង្ស័យថាមានបញ្ហាបច្ចេកទេស។

ជើងហោះហើរ AI315 ដែលដំណើរការដោយយន្តហោះប៊ូអ៊ីង 787-8 Dreamliner ក្នុងទិសដៅពីទីក្រុងហុងកុង ទៅក្រុងញូវដេលី បានចាកចេញតាមការគ្រោងទុក ប៉ុន្តែបានហោះត្រឡប់ទៅហុងកុងវិញនៅពាក់កណ្តាលអាកាស បន្ទាប់ពីអាកាសយានិក បានសង្កេតឃើញថាប្រព័ន្ធដំណើរការខុសប្រក្រតី នេះបើយោងតាមប្រភពដែលដឹងពីឧប្បត្តិហេតុនោះ។

យន្តហោះនេះបានចុះចតដោយសុវត្ថិភាពក្នុងទីក្រុងហុងកុង ហើយអ្នកដំណើរទាំងអស់ត្រូវរាយការណ៍ថាមានសុវត្ថិភាព។ បច្ចុប្បន្នក្រុមបច្ចេកទេសកំពុងត្រួតពិនិត្យយន្តហោះដើម្បីកំណត់ពីមូលហេតុឬសគល់នៃបញ្ហានេះ។

ឧប្បត្តិហេតុចុងក្រោយនេះបានកើតឡើង បន្ទាប់ពីជើងហោះហើរដាច់ដោយឡែកមួយមកពីក្រុមហ៊ុន Air India ដដែលនេះ ដែលហោះពីកោះភូកេត របស់ថៃ តម្រង់ទៅកាន់ទីក្រុងញូវដេលី បានបង្ខំចិត្តស្នើចុះចតជាបន្ទាន់នៅថ្ងៃសុក្រ (១៣ មិថុនា) សប្ដាហ៍មុន បន្ទាប់ពីសារគម្រាមកំហែងបំផ្ទុះគ្រាប់បែក ត្រូវបានទទួលនៅលើយន្តហោះ ហើយក៏កើតឡើងបន្ទាប់ពីសោកនាដកម្មធ្លាក់យន្តហោះប៊ូអ៊ីងរបស់ Air India ដែលសម្លាប់មនុស្សរាប់រយនាក់ក្នុងទីក្រុង Ahmedabad របស់ឥណ្ឌា៕