ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) ក្នុងអំឡុងពេលបំពេញទស្សនកិច្ចទៅកាន់ដែនដី Greenland ដើម្បីផ្តល់ការគាំទ្រដល់កោះអាក់ទិចនេះ បាននិយាយកាលពីថ្ងៃអាទិត្យថា រុស្ស៊ីខ្វះភាពជឿជាក់ក្នុងការសម្របសម្រួលវិបត្តិរវាងអ៊ីស្រាអែល និងអ៊ីរ៉ង់ ខណៈដែលលោកប្រធានាធិបតីអាមេរិក ដូណាល់ ត្រាំ ( Donald Trump) បានស្នើនោះ។

នៅក្នុងបទសម្ភាសន៍ជាមួយសារព័ត៌មាន ABC News កាលពីថ្ងៃអាទិត្យ លោក ត្រាំ បាននិយាយថា លោកបើកចំហចំពោះលោក ពូទីន ដែលកងកម្លាំងរបស់ពួកគេ បានលុកលុយអ៊ុយក្រែន និងជាអ្នកដែលបានប្រឆាំងនឹងការប៉ុនប៉ងរបស់លោក ត្រាំ ក្នុងការសម្របសម្រួលបទឈប់បាញ់ជាមួយទីក្រុងគៀវ ដោយសម្របសម្រួលរវាងអ៊ីស្រាអែល និងអ៊ីរ៉ង់។ លោក ម៉ាក្រុង បាននិយាយថា លោកបានច្រានចោលគំនិតបែបនេះ។

លោក ម៉ាក្រុង បានថ្លែងថា៖«ខ្ញុំមិនជឿថា ប្រទេសរុស្ស៊ីដែលឥឡូវនេះកំពុងចូលរួមក្នុងជម្លោះដ៏ខ្លាំងក្លាមួយ ហើយបានសម្រេចចិត្តមិនគោរពធម្មនុញ្ញអង្គការសហប្រជាជាតិអស់រយៈពេលជាច្រើនឆ្នាំមកនេះ មិនអាចធ្វើជាអ្នកសម្រុះសម្រួលបាន»។

លោកក៏បាននិយាយដែរថា ប្រទេសបារាំងមិនបានចូលរួមក្នុងការវាយប្រហារណាមួយរបស់អ៊ីស្រាអែលប្រឆាំងនឹងអ៊ីរ៉ង់ទេ។

លោក ម៉ាក្រុង បានធ្វើទស្សនកិច្ចនៅតំបន់ Greenland ដែលជាផ្នែកស្វ័យគ្រប់គ្រងនៃប្រទេសដាណឺម៉ាក ដោយមានសិទ្ធិប្រកាសឯករាជ្យ ដែលលោក ត្រាំ បានគម្រាមថា នឹងគ្រប់គ្រង នៅមុនដំណើរទៅកាន់ប្រទេសកាណាដាសម្រាប់កិច្ចប្រជុំកំពូលរបស់ក្រុមមេដឹកនាំ G7 ។

នៅក្នុងសន្និសីទសារព័ត៌មានមួយជាមួយនាយករដ្ឋមន្ត្រីដាណឺម៉ាក លោកស្រី Mette Frederiksen និងនាយករដ្ឋមន្ត្រីរបស់ Greenland លោក Jens-Frederik Nielsen លោក ម៉ាក្រុង បាននិយាយថា កោះនេះ ត្រូវបានគំរាមកំហែងដោយ «មហិច្ឆតាដ៏គួរឲ្យខ្លាច» ហើយថា ស្ថានភាពរបស់វា គឺជាការដាស់តឿនដល់ប្រជាជនអឺរ៉ុបទាំងអស់។