ក្រសួងការបរទេស បានប្រាប់ថា អ្នកការទូតជាន់ខ្ពស់របស់ចិន លោក Wang Yi បានសន្ទនាតាមទូរសព្ទជាមួយសមភាគីអ៊ីស្រាអែល និងអ៊ីរ៉ង់ កាលពីចុងសប្ដាហ៍កន្លងមក ជាពេលដែលលោកបានបញ្ជាក់យ៉ាងច្បាស់ៗនូវការគាំទ្ររបស់ទីក្រុងប៉េកាំង ចំពោះទីក្រុងតេអេរ៉ង់។

គួរបញ្ជាក់ថា មហាអំណាចតំបន់មជ្ឈិមបូព៌ាទាំង២ បានបាញ់តគ្នា ការពីថ្ងៃសៅរ៍ (ទី១៤ ខែមិថុនា) ពោលគឺមួយថ្ងៃបន្ទាប់ពីអ៊ីស្រាអែលបានបើកយុទ្ធនាការទម្លាក់គ្រាប់បែកពីលើអាកាស ដែលមិនធ្លាប់មានពីមុនមក ដោយផ្តោតលើទីតាំងនុយក្លេអ៊ែរ និងយោធារបស់អ៊ីរ៉ង់។

បន្ទាប់ពីមានការវាយប្រហារសងសឹកគ្នានេះទៅវិញទៅមកនេះ ការអំពាវនាវជាអន្តរជាតិឲ្យអត់ធ្មត់ កំពុងកើនឡើង ខណៈដែលមានការភ័យខ្លាចខ្លាំងឡើងៗ ដែលថា តំបន់អាចកៀកនឹងការរាលដាលជម្លោះកាន់តែធំទៅៗ។ ហើយដើម្បីបញ្ជាក់ពីការចូលរួមរបស់ខ្លួន ក្រសួងការបរទេសចិន បានចេញផ្សាយសេចក្តីថ្លែងការណ៍ដាច់ដោយឡែក កាលពីល្ងាចថ្ងៃសៅរ៍ ដោយប្រកាសពីការជជែកតាមទូរសព្ទរបស់លោក Wang ជាមួយសមភាគីរបស់លោក។

លោក Wang បាននិយាយជាដំបូងទៅកាន់រដ្ឋមន្ត្រីការបរទេសអ៊ីរ៉ង់ លោក Abbas Araghchi ដោយបានប្រាប់ថា ទីក្រុងប៉េកាំង «គាំទ្រអ៊ីរ៉ង់ក្នុងការការពារអធិបតេយ្យភាពជាតិ ការពារសិទ្ធិ និងផលប្រយោជន៍ស្របច្បាប់ និងការធានាសុវត្ថិភាពរបស់ប្រជាជនខ្លួន»។ លោក Wang បានបញ្ជាក់ប្រាប់លោក Araghchi ថា វិធានការរបស់អ៊ីស្រាអែល «បំពានយ៉ាងធ្ងន់ធ្ងរលើបទដ្ឋានជាមូលដ្ឋានដែលគ្រប់គ្រងទំនាក់ទំនងអន្តរជាតិ» ហើយបានកត់សម្គាល់ថា ការវាយប្រហារលើរោងចក្រនុយក្លេអ៊ែររបស់ក្រុងតេអេរ៉ង់ «បានបង្កើតបានជាគំរូគ្រោះថ្នាក់ ដែលអាចនាំឲ្យមានផលវិបាកដ៏មហន្តរាយ»។

ចំណែកសេចក្តីថ្លែងការណ៍ទី២ ដែលបានចេញផ្សាយភ្លាមៗបន្ទាប់ពីនោះ បានរៀបរាប់លម្អិត អំពីកិច្ចពិភាក្សារបស់លោក Wang ជាមួយរដ្ឋមន្ត្រីការបរទេសអ៊ីស្រាអែលល លោក Gideon Saar។ លោក Wang បានប្រាប់លោក Saar ថា «ចិនប្រឆាំងយ៉ាងខ្លាំង ចំពោះការរំលោភច្បាប់អន្តរជាតិរបស់អ៊ីស្រាអែល ដែលវាយប្រហារអ៊ីរ៉ង់ដោយកម្លាំង» ដោយហៅចំណាត់ការរបស់ប្រទេសនេះថា «មិនអាចទទួលយកបានឡើយ»។

ជាមួយគ្នានេះ សេចក្ដីថ្លែងបានបញ្ជាក់បន្ថែមថា លោករដ្ឋមន្ត្រីការរទេសចិន បានប្រាប់សមភាគីទាំង ២រូបថា ប្រទេសចិនមានឆន្ទៈ ក្នុងការដើរតួនាទីស្ថាបនា ដើម្បីរួមចំណែកកាត់បន្ថយជម្លោះនេះ៕