នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃចន្ទ (ទី១៦ ខែមិថុនា) នេះ បានប្រាប់ឲ្យដឹងថា ការបង្កើនចំនួននាវាមុជទឹកដើរដោយថាមពលនុយក្លេអ៊ែរដែលដំណើរការដោយអូស្ត្រាលី អង់គ្លេស និងសហរដ្ឋអាមេរិក នឹងធ្វើឲ្យតំបន់ឥណ្ឌូប៉ាស៊ីហ្វិកកាន់តែមានសុវត្ថិភាព និងជាផលប្រយោជន៍របស់សហរដ្ឋអាមេរិក។

គួរដឹងថា លោក Albanese នឹងជួបប្រធានាធិបតីអាមេរិក លោក Donald Trump ជាលើកដំបូង នៅថ្ងៃទី១៧ ខែមិថុនា ក្នុងទីក្រុង Calgary នៅខាងក្រៅកិច្ចប្រជុំក្រុមប្រទេសមានឧស្សាហកម្មលូតលាស់ទាំង៧ (G7) ដោយបញ្ហាពន្ធគយ និងការពិនិត្យឡើងវិញរបស់ទីក្រុងវ៉ាស៊ីនតោន ចំពោះសន្ធិសញ្ញានៃសម្ព័ន្ធ Aukus ជុំវិញការផ្ទេរនាវាមុជទឹកនុយក្លេអ៊ែរទៅកាន់ប្រទេសអូស្ត្រាលី នឹងធ្វើឲ្យកិច្ចពិភាក្សាកាន់តែតានតឹង។

លោក Albanese បានប្រាប់អ្នកសារព័ត៌មាននៅទីក្រុង Calgary ថា៖ «ដោយអូស្ត្រាលី ចក្រភពអង់គ្លេស និងសហរដ្ឋអាមេរិក បានបង្កើននាវាមុជទឹកដើរដោយថាមពលនុយក្លេអ៊ែរទាំងអស់គ្នា ក្នុងករណីរបស់យើងបំពាក់អាវុធធម្មតាទូទៅ គឺជាអ្វីដែលនឹងធ្វើឲ្យតំបន់ឥណ្ឌូប៉ាស៊ីហ្វិកកាន់តែមានសុវត្ថិភាព»។ ហើយលោកបានបញ្ជាក់បន្ថែមថា៖ «នោះជាផលប្រយោជន៍របស់សហរដ្ឋអាមេរិក»។

លោក Albanese បានប្រាប់ថា លោកនឹងគូសបញ្ជាក់ដល់លោក Trump នូវការគាំទ្រផ្នែកហិរញ្ញវត្ថុដែលអូស្ត្រាលីកំពុងផ្តល់ដល់សមត្ថភាពឧស្សាហកម្មរបស់សហរដ្ឋអាមេរិក ក្នុងការសាងសង់នាវាមុជទឹកថ្មី នៅក្រោមកិច្ចព្រមព្រៀងរបស់សម្ព័ន្ធ Aukus ហើយរូបលោកនឹងអះអាងពីលទ្ធភាពទទួលបានកងនាវាមុជទឹករបស់សហរដ្ឋអាមេរិក ដែលនឹងអនុញ្ញាតឲ្យអាមេរិកមានសិទ្ធិចូលទៅកាន់ទីកន្លែងថែទាំជុសជួលនាវា នៅក្នុងប្រទេសអូស្ត្រាលី ក៏ដូចជានិយាយពីវត្តមានយោធាអាមេរិកដែលមានស្រាប់ នៅក្នុងទីក្រុង Darwin ភាគខាងជើងនៃប្រទេសអូស្ត្រាលី។

ហើយជាមួយគ្នានេះ លោកនាយករដ្ឋមន្ត្រីអូស្ត្រាលីបានសង្កត់ធ្ងន់ថា ប្រទេសរបស់លោក គឺជាដៃគូដ៏គួរឲ្យទុកចិត្តរបស់សហរដ្ឋអាមេរិក នៅក្នុងតំបន់ប៉ាស៊ីហ្វិក ដើម្បីលើកកម្ពស់សន្តិភាព និងសន្តិសុខ៕